Ym ban pyn bha briew tang ia lade, katba ka skul pat ka long kum ka sem masi

Shillong: Ka General meeting jong ka Meghalaya Schools Welfare Development Association (MSWDA) kaba la long ha ka 14tarik Nailur 2019 ka la rai ban ai jingkyrshan ba pura ia ka seng kaba don ia la ka nongrim bad ki jingthmu kiba bha na ka bynta ki skul baroh kiba angnud bad thrang ban kyntiew / pynbha shuh shuh ia ka pule puthi haka jylla baroh kawei naduh Pri-Primary haduh Secondary/Higher Secondary .

Ka meeting ka la rai ruh ia ki katto katne ki kam kiba dei ki common issues kiba ki Nonghikai jong ki Skul ki ia kynduh jingeh kita ki long halor ka Improvement Exam haka class XII ,ka traing D.EL.ED offline ba pyniaid da ka NIOS bad ka jing bym lah ban certified noh ia ki Original Mark Sheet D.EL.ED online ia ki ba la dep ia ka graduate/master degree kat kum ka NCTE Norms.. Halor kine ki mat ba la kdew ka jingialang paitbah ka la rai bad aiti ha ki nongialam ban ia kynduh ia ki bor jong ka Sorkar ban ia kren bad pynbeit sani halor kine ki jingeh.
Ha kane ka jingialang la pyniaid da u Bah N.L.Marshiangbai Vice President ia kaba la ioh pat ia ka jing pynshai ba bniah na U President Bah H.M.Marbaniang halor ki jingthmu jong kane ka meeting bad ki kam ruh kiba la iaid lynti lyngba ka jingkyrshan ia ki issue kiba la ialam bad pyniaid da ki convener ha kaba la ioh jingkren ruh naki kita ki long u Bah B.Nongbri convener jong ki Nonghikai ba dang donkam ia ka improvement exam bad kong R.Shadap convener jong ki D.EL.ED offline batch 2013-15. Kumjuh ruh la ioh jingkren na u Bah R.F.L.Nonglait ba la mihkhmat na ka bynta ki 4th teachers.

Hadien ka jingpule ia ki jingthmu (aims bad objectives) jong ka seng da u Genl.Secretary Bah D.Q.Kharbuli na ka liang jong U president u la pynshai sani bad u la ong ruh ba kane ka seng kamdei ka khun ne ka kmie jong kino kino ki Association kumjuh ruh ka jing mih jong ka kam dei na ka bynta ban pyn pait pyn pra ia kiwei pat ki seng hynrei kane ka seng ka don la ka jong ka nongrim kumba la dep pynshai ha ki lad pathai khubor dang shen kumjuh ruh ka lah ban peit ia ki common issues kiba ki skul ne Nonghikai ki ia kynduh kiba kiwei pat ki Association ki hap ban peit tang ia lade.

Shuh shuh ruh u la ong ba ngi hap ban peit ia ka iing ba ngi shong ym ban pyn bha briew tang ia lade, katba ka Skul pat ka long kum ka sem masi, namar kaba ktah ia ka skul kan ktah ia baroh kiba don hapoh jong ka.
Kiba la poi sha ka jingialang ba la hap ban pynlong ar bynta kata ha ka por 11.00 bad 1:30 namar ka jing bym ngiam shuh ka hall ki long baroh 689 ngut katkum ka registration.Kumjuh ruh ban pynkhlain shuh ia ka seng ki nongialam kin sa leit pynlong general meeting ha Garo hillls bad ha ki District/block baroh.