Woh daw U bah Process, bym iakren ILP, ka AITC sha Delhi

Shillong:U bah Process T Sawkmie u MLA ka Mawlai Constituency, u la buh ka jingkylli ia ki MLA jong ka All India Trinamool Congress (AITC) halor ka jing leit dawa ban pyntrei kam ia ki jingdawa kiba iadei bad ka jaitbynriew shaduh Delhi, hynrei ki khlem rah ia ka mat Inner Line Permit (ILP).

Haba ia kren bad ki lad pathai khubor na ka liang u bah Sawkmie u la ong “Na ka liang ka AITC ki la leit ban dawa sha ka sorkar pdeng na ka bynta ban ithuh noh ia ka ktien khasi bad Garo hapoh ka khyrnit baphra jong ka riti synshar jong ka Ri india bad ia ka mat pynbeit u pud u sam bad nga ai khublei halor ka jingshim khia jong ki halor kane ka bynta”.

“Hynrei ka long kaba lyngngoh ban iohi ba ka state unit AITC, ka khlem treh ban rah pat ia ka mat jingdawa ban pyntrei kam ia ka ILP ha ka jylla, namar ba mynshwa haba ngi dang don lang ha ka Congress, ngi la don bynta lang ban kyrshan ia ka resolution ban dawa na ka sorkar pdeng ban ai noh ia ka ILP”u la bynrap.

U la ong ruh “U Union minister Amit Shah ruh u la kular ban ai noh ia ki jingdawa jong ngi, hynrei ngam tip kano ka daw ba haduh mynta ka dang sahteng bad na ka liang ki MLA ki sengbhalang ki la dawa ia kane, hynrei ki MLA ka AITC haba ki leit ban dawa ia ki mat jong ka jaitbynriew, balei ki ieh ia ka mat ILP, kane ka dei ka jingkylli bah eh ba nga kwah kylli ia ki”.

“Nga kwah kylli ia ki MLA ka AITC, hato kin dang don bynta lang bad ka resolution kaba ki la pdiang lang ha ingdorbar bad hato ha ki mat trei kam ka AITC kan buh ia ka mat ILP, namar ka ILP ka dei ka ain kaba khlain ban iada ia ki rit paid wat la ha ka jylla ka don ka khyrnit ba hynriew, hynrei ki don la ka jong ka bynta”la ong u bah Process.

“Na ka liang jong nga, nga dawa na ka sorkar India ba kan pynurlong noh ia ki jingdawa jong ngi bad ruh nga buh ia ka jingkyrpad na u Myntri rangbah ka jylla bad kumjuh u Symbud Myntri rangbah ba lada donkam ki hap ban shim khia ban ia lam ia baroh sha Delhi ban dawa ia ka ILP ha ka jylla”u la bynrap.
U la kynnoh ruh “Ka AITC ka leh politic halor kane ka bynta ha kaba ka la ieh ia kane ka mat bad ka jingleit Delhi ka dei ban long halor ka jingpyni ba ki MLA baroh ki dang ieng skhem ban dawa ia ka ILP ha ka jylla”la ong u bah Sawkmie.