Shillong, 13’lyngkot:
U khyllung ba dang 5snem karta u la wiang ding ia ka ïng lajong bad ka ding ka la bamduh ia katei ka ing haduh ba kan da kylla dpei. Katei ka jingjia ka la jia ha ka shnong Mawsaw Mihngi mynta ka step ha ka por 9:17 baje mynstep. Katei ka dei ka ing jong ka kong Sharati Iawphniaw ka lok jong u bah Pipa Roy. Ha ka por ba jia katei ka jingjia ka kong Sharati ka leit thied jingthied na dukan bad ki don 4 ngut ki khun jong ka ha ing.
Uwei napdeng jong ki uba dang 5 snem karta u la lehkai da ka ding bad u la wiang ding ia ka ing lajong. Tang mar ia sdang klang ka ding u hynmen jong utei u khynnah uba la don 14 snem karta u la pyrta shnong ban iarap bad u la sei noh shabar wut wut ia ki para rit jong u kiba don ha ing. Tang mar kumta hi u paidbah nongshong shnong u la wan poi sha katei ka jaka hynrei namar ka jingklang palat ka ding kim shym la lah ban tem haduh ba katei ka ing ka la ing haduh ban da kylla dpei.
Hapoh katei ka ing tin kaba ker kynroh da ki dewbilat bad don ki bynta ba sop da u traw la don baroh ki jingdon jingem katei ka ing naduh ka pisa pilaiñ, ki kot ki slab a kynthup ia ki dulir khyndew , ki tiar ki tar, ki jain ki nep bad baroh la ong ba ka jingjulor ka la kot sha ka T.25 lak tyngka. Ia katei ka longing mynta ka shnong ka la ai jaka shipor ba kin shong kin sah ha ing skul ka United Christian Upper Secondary Mawsaw Mihngi kaba hap hapoh Mawkyrwat C&RD Block.
Ki nongialam ki la kyrpad ia ki nongmihkhmat paidbah, ki sengbhalang ne ki riew shimet ba kin kner ia ki kti jingiarap sha katei ka longing kaba la mad ia katei ka apot la da ki tiar ki tar ne da ki pisa pilaiñ, ki nongialam ki la kyrpad ia ki nongnoh jingiarap da ka pisa ba kin thep ha ka account jong katei ka longkmie khnang ba kan poi beit beit ha kti jong ka bad u account nombar u dei 15012022181 kaba dei ha Meghalaya Rural Bank Mawthawpdah Branch.
Phi don ban ong eiei?