Shillong, 11 Nailar:
U Myntri Rangbah ka jylla u la wer ia ki paidbah ka jylla ba kin wan iashim bynta ban rakhe ia ka jingdap 70 snem ka jinglait luid ka ri India kaban kham kyrpang ha ka jylla.
Haba kren sha ki nongthoh khubor hadien ba la wai ka jingialang jong ka kynhun myntri mynta ka sngi, u Dr Mukul u la ong ba ka sorkar ka suk ka sain kala wan ha kane ka jylla hadien ka jingtrei shitom jong ka sorkar bad ka tnad pulit kaba iai peitngor man ka sngi ban khang lad ia ki kam bymman, ki riew sniew pyrshah ri.
“Ka suk ka sain ka dei ka bynta ba ka sorkar ka pynleit jingmut bha ban pynthikna ba ka jingsuk kan shong ha ka jylla”, la ong u Myntri Rangbah.
Ki paidbah ki dei ban rakhe ia kane ka sngi laitluid da ka jingkmen haba ki bor jong ka ain ki la pynbiang ia ka jingphikir kaba biang ban pynlong ka sngi rakhe kaba kmen.
Katkum ka jingong jong u Mukul, ka sorkar ka la mang pisa lyngba ka CMYDS ban ai jingiarap ia ki kynhun ki seng ba kin pynlut ha kum kane ka sngi ban rakhe ia ka sngi laitluid.
“Ngi kyrpad ia ki paidbah ban wan rakhe ia kane ka sngi ha ka rukom kaba kham paka”, la ong u Myntri Rangbah.
Ka jingialang jong ka kynhun myntri, ka la pynbeit pali ruh ia ki myntri sorkar ban leit pynher lama India ha ka sngi laitluid ha ka 15 tarik ha kylleng ki jaka ha ka jylla kynthup ha Shillong ban pynher lama da u Myntri Rangbah u Mukul Sangma, ha Tura ban pynher lama da u AL Hek, Bah DD Lapang ha Nongpoh, bah Rowel Lyngdoh ha Mawkyrwat, Dr RC Laloo ha Jowai,Kong Roshan Warjri ha Mairang, ha Nongstoin u AT Mondal, ha Khliehriat Bah Sniawbhalang Dhar, ha Amlarem Bah Stephanson Mukhim, Williamnagar Kong Ampareen Lyngdoh, Baghmara Bah Prestone Tynsong bad kiwei .
Phi don ban ong eiei?