Wer paidbah ka KHNAM, HANM sha ka proseshon 30 tarik

Shillong, 23 Risaw:
Ka Khun Hynnie wtrep National Awakening Movement kan pynlong ia ka jingiaid paidbah Rally da ka thuk thuk ha ka 27 tarik mynta u bnai bad kan sdang na madan student ha ka por 12 baje shiteng sngi. Katei ka jingiaid paidbah ka long ban kyrshan bad kyrsiew thiah ia ki paidbah ba kin mih ryntih ha ka 30 tarik mynta u bnai ha ka proseshon ba la ynbeit da ka Synjuk Ki Nongsynshar Shnong ka Bri u Hynniewtrep bad kumjuh ruh ban dawa ba u myntri rangbah ka jylla u Dr.Mukul Sangma bad ka kynhun myntri jong u ba kin hiar shuki noh kumba la thrang da u paidbah. Ha ka kyrwoh ba la phah da u nongialam ka HANM pat u bah Lamphrang Kharbani u la wer ia ki paidbah bad kumjuh ruh ia baroh ki dkhot ka HANM ba kin ia mih paidbah ha ka 30 tarik mynta u bnai ha ka jingiaid proseshon paidbah ba la pynbeit da ki Rangbah Shnong.
Ka kyrwoh na u General Secretary Ka Synjuk ki Nongsynshar Shnong ka Bri U Hynniewtrep (SNSBH) u bah R. L Blah pat ka la ong ba ka kwah ban pynshai ia ka jingmih khubor halor ka shithi ba la ioh na u Myntri Rangbah ha kaba iadei bad ka jingkular jong u ba ka Sorkar kan ym mushlia ia ki kam kiba dei khmih da ki District Council. Halor kane, ka SNSBH ka kwah ban pynshai ba u Myntri Rangbah u la ai ia katei ka jingkular ha u 4 tarik, Lber 2015 hynrei la shem pat ba wat nadien katei ka tarik ruh ki kam ba u la leh kim shym long katkum ka jingkular jong u. Katei ka Synjuk ka kwah ban pynshai ba ka jingphah shithi jong u Myntri Rangbah ha kum kane ka por ka long ka bym iahap haei haei ruh bad ka jingdawa ki bad la sngewthuh shai kdar ba katei baroh ka long tang ka kam politik ban pynpulom ia ka jingthmu jong ka SNSBH ban iaid paidbah ha ka 30  tarik mynta u bnai.   Shuh shuh, ka SNSBH ka kyntu ia ki paidbah ba kin ym shah pynthame da kine ki kam leh politik u Myntri Rangbah hynrei ban kyrshan bor bah ia ka jing iawer ka Synjuk ban iaid paidbah ha ka 30 tarik ban dawa shisyndon ia ka hok u paid ka Bri U Hynniewtrep bad ha kajuh ka por ban dawa ruh ia u Myntri Rangbah bad ki myntri jong u ba kin hiar shuki noh.pynkut katei ka kyrwoh.