Shillong:Ka KSU Sengkmie lyngba ka Education Cell jong ka ka la khot la wer ia baroh ki samla pule jong ka jaitbynriew Khasi na ki kolej bad ki skulbah bapher bapher ba kin wan ban ia shim bynta ha ka jingialang paidbah jong ka Khasi Author Society ( KAS) ka ban long ha ka 22 tarik mynta u bnai ha Madan Malki na ka bynta ban dawa ban pynrung noh ia ka ktien Khasi ha ka khyrnit kaba 8 jong ka Riti Synshar ka ri India. Ka kyrwoh na u Education Secretary ka KSU u samla Readyon S Nongrum ka la kyntu ia ki Principal jong ki kolej baroh ba ki dei ban sha ia ki samla pule Khasi ba kin wan ban ia shim bynta ha katei ka jingialang. U Education Secretary ka HYC Sengkmie u Wellesly Lyngkhoi u la ong ba kane ka dei ka mat jingdawa jong ka HYC ha ka Save Hynniewtrep mission bad u la kyntu ia ki paidbah ban ia mih ryntih sha katei ka jingialang jong ka KAS. Ka kyrwoh ka la kyntu ruh ia ki dkhot ka HYC ban ia mih paidbah ha katei ka sngi ban pynsawa ia ka bom ka ksing bad ban pyrta ruh ia ka jingsngew sha ka sorkar.