Shillong:Ka KSU sengkmie lyngba ka Education Cell ka wer ia baroh ki samla pule jong ka Jaitbynriew Khasi na ki College ki University bapher bapher, ban ia wan ban shim bynta sha ka jing ialang bah ba la khot pynlong da ka Khasi Authors Society ha ka 22 Tarik Nailur 2018 naduh ka por 10 baje mynstep ha madan Malki na ka bynta ban dawa na ka Sorkar Jylla bad ka Sorkar Kmie ban ithuh ia ka ktien Khasi da kaba pynrung ia ka ha ka khyrnit ba phra jong ka Riti synshar jong ka Ri India.
Ka Seng lyngba kane ka kyrwoh ka la sngew dei ban shim ia ka lad ban khot ban wer lang ia baroh ki paradoh para snam sha kane ka jing ialang ban pyni ia ka jing ia tylli bad ka jing ia long kawei na ka bynta ban pyn neh pynsah ia ka Ktien Khasi. “To ngin ia mih paidbah sha kane ka Rally Bah, ban pynpaw sha ka pyrthei ba don bun Seng Niam, Kur bad Hima hynrei ka Jaitbynriew te tang kawei bad ka ktien ruh tang kawei kata ka dei KA KTIEN KHASI BAIAR” ong ka kyrwoh na U U Samla Pynshaiborlang Rani,Secretary Education Cell KSU Seng Kmie bad ka seng ka kyntu ruh ia baroh ki Principal jong ki College baroh ban shah bad ban phah ia ki samla pule Khasi sha kane ka jing ialang bah.