Nongpoh: Kumba la ju long manla u snem, shibynta ban nangiai kyntiew ia ka sap ka phong jong ki khun samla ha ka kam ialehkai phubol, na ka liang ki nongialam ka Byrnihat Sports Association (BSA), ki la pynbna paidbah ba shen kin sa sdang noh ia ka lympung ialehkai kaba la tip kum ka 5th BSA Football Tournament 2019 ha Madan Byrnihat.
Ka kyrwoh na ki nongpyniaid ka BSA, la ong ba ha katei ka lympung yn phiah ha ki Lai bynta bad kata ka long ha ka U-16, Senior bad Veteran.
Haba iadei bad ki U-16, yn shim T. 300 ka Bairung bad ka khusnam kan long T.10 hajar lem bad ka Trophy. Ha ki senior yn shim T. 700 ka bairung bad ka khusnam kan long T.20 hajar lem bad ka Trophy, katba ha ka Veteran yn shim T.800 ka bairung bad ka khusnam kan long T.15 hajar lem bad ka Trophy.
Na ka bynta ki Senior bad U-16 yn shah tang ia ki team kiba dei tang ha ki thain kiba hap hapoh ka BSA, kata ka long na Umling shaduh Umtyrnga. Katba ha ka Veteran yn shah sngewbha ia baroh ki kynhun kiba dei na Ri Bhoi bad ki Rangialehkai ki dei ban long kiba la 35 snem shaneng.
Ka tarik ba khadduh ban pdiang sha katei ka lympung ialehkai kan long ha ka 28/01/2019 bad ka screening ia ki U-16 kan long ha ka 29/01/2019 ha madan BSA, na ka bynta ki jingtip kiba kham bniah lah ruh ban phun ha ki number 9862306090/ 9862476368/8837341495/ 9862866056 lane kynduh ia ki nongkitkam ka BSA.