Weng pakhang shnong ki 5 seng

Shillong, 28 Iaiong:
Ki san seng ha East Jaintia Hills District ki la weng noh shipor ia ka pakhang shnong ba 48 kynta ba ki la khot ha ka 30 tari mynta u bnai, ki san seng ki la weng noh ia katei ka pakhang shnong namar ba ka don ka jingiaseng General Assembly jong ka Presbyterian Church of India (PCI) ha ka balang Presbyterian Laitumkhrah, Shillong naduh ka 30 tarik mynta u bnai haduh ka 4 tarik u bnai ban wan. Ki san seng ki la pdiang ruh ia ka jingkhot u Deputy Commissioner ka East Jaintia Hills District, u Bah WR Lyngdoh ia ki lashai ka sngi ha ka por 2 baje mynsngi ha ka ophis trei kam jong u.
Ka jingiasengbah jong ka Presbyterian Church of India (PCI) kan long ia ka 41st Bennial Assembly ha ka Balang Presbyterian Laitumkhrah naduh ka 30 tarik Iaiong haduh 4 tarik Jymmang 2014.
Halor kane, na ka liang ka PCI ka la kyrpad ia ki sengbhalang ha Jaintia Hills ba kin sngewbha ban pynlait noh ia ka jingpakhang surok ba 48 kynta ha East Jaintia Hills khnang ban ailad ia ki nongwan iaseng.