Weng noh sa ka AJYWO-EJZ, na ka kynhun jong ki 9 seng

Jowai, 25’lyngkot:
Hadien ba ka KSU ka la weng noh na ka komit jong ki 9 seng kiba dang iaid ka jingiakhih ha ri-lum Jaintia mynta pat sa ka All Jaintia Youth Welfare Organisation – East Jaintia Zone (AJYWO-EJZ) kawei na ki seng kaba la ju ia don bynta bad ka kynhun jong ki 9 seng kiba iakhih ha ka jingiadei bad ka jingjia ha Mookhep ka la pyntip mynhynnin ka sngi sha ka kynhun jong ki 9 seng ba ka seng ka la weng noh ia lade na ka kynhun jong ki 9 tylli ki sengbhalang kiba la ju khot pynlong ia ka jingiakhih da ka ha ka jingiadei bad ka jingjia ha Mookhep.
U President jong ka AJYWO-EJZ, u Bah WS Suting u la ong ba mynshuwa ki ia don 10 seng hynrei kat nang iaid ki sngi ngi dang ia duna bad kane kam shym la pynsngewtynnad ia ka seng (AJYWO-EJZ). Dang ha kine ki khyndiat sngi ba la dep ruh la mih biang sa kawei ka seng na kane ka kynhun jong ki 9 seng bad kane ka la nang ktah shuh shuh ia ka jingsngew jong ka seng hi shimet kat haduh ba ka AJYWO-EJZ ruh ka la shim ia kane ka rai ban mih noh na katei ka kynhun jong ki 9 seng hynrei ym ba ka don daw ei ei pat ia ki seng ki don ha ka kynhun jong ki 9 seng hynrei ka AJYWO-EJZ ka shim ia kane ka rai ban mih noh na kane ka kynhun da ka lynti kaba khuid bad ka bym tharai sniew iano iano ruh em na katei ka kynhun jong ki 9 seng.
Ka AJYWO-EJZ ka la pyntip ruh ba kan ym iadon bynta shuh ha kane ka jingkhot pakhang surok miet ba la khot pynlong ha ka kyrteng jong ka kynhun ki 9 seng, kata ha ka 28 bad 29 tarik mynta u bnai bad ruh ha ka juh ka por ka seng ka la pyntip ruh ba naduh nangne hi sha khmat ka seng kan ym iadon bynta shuh ha kino kino ki jingkhot pynlong ia ki jingiakhih ba lah ban khot pynlong da katei ka kynhun jong kitei seng kiba dang sah na ka katei ka kynhun jong ki 9 seng ha ka jingiadei bad ka jingjia ha Mookhep, la bynrap u kyrwoh na ka seng.
Ka AJYWO ka pan map ruh na ki kynhun kiba dang neh ha katei ka kynhun jong ki 9 seng ba kim dei ban sngew ei ei ia ka seng ba ka la hap ban mih noh ia lade na katei ka kynhun jong ki bad ruh ha ka juh ka por ka seng ka kitbok kit rwiang ia kito baroh kiba dang sah ha ka kynhun jong ki 9 seng ba kin nang iai sha khmat ha ka jingshakri jong ki ia ka ri bad ka jaidbynriew, La pynkut u kyrwoh na ka AJYWO-EJZ.