Weng noh ka AMPSTA, na ki jingiakhih ka JACATAM

Shillong, 9 Nailur:
Ka seng jong ki nonghikai skul lower primary ka All Meghalaya Primary School Teachers’ Association (AMPSTA) ka la rai ban ym iashim bynta ha ka prokram iakhih jong ki nonghikai ba la khot pynlong hapoh ka lama jong ka Joint Action Committee of All Teachers’ Association of Megha laya (JACATAM) ban sdang naduh ka 11 tarik haduh 13 tarik mynta u Nailur.
Ka AMPSTA ka la shim ia kane ka rai ha ka executive committee kaba long dang shen.
Katkum ka kyrwoh ba la pynmih, ka AMPSTA ka la ong ba la rai ban ym iashim bynta ha ka jingiakhih bad ka JACATAM namar ba bun ki jingdawa kim tip bha. U Asst general secretary ka AMPSTA u Bah T Tiewsoh u la ong ha kane ka sngi Nyngkong ha ka kyrwoh, ba ka AMPSTA kam kwah ban iashim bynta ha ka jingiakhih jong ka JACATAM namar ba kam tip bha ia ki jingdawa jongki.
U Bah Tiewsoh u la ong ruh ba ka jingialang ka la rai ba lada kano kano ne uno uno u nonghikai kin leit iashim bynta ha ka prokram iakhih ka JACATAM, ka seng kan ym kitkhlieh bad ki dei ban tip hi.
U la ong ba ka AMPSTA kan leit iakynduh ia u Symbud Myntri Rangbah ka jylla u Dr RC Laloo ban iakren ha ka 30 tarik mynta u bnai ban buh ia ki jingdawa jongki.
Ki jingdawa jong ki AMPSTA ki long ka jingpynsangeh ka sorkar ia ka head teacher allowance bad ban ai ia ka CPF bad ka DCRG sha baroh ki nonghikai skul lower primary school bym dei sorkar, ban ai ia ka increment ia kiba kham heh kyrdan ban khein naduh ka 1 tarik Kyllalyngkot, 2004 nalor kiwei pat.