Weng noh ia ka odd-even number ki kali & shah noh ïa ki jingïaseng heh, ong ka HYC

Nongstoiñ: Ka Seng Hynniewtrep Youths’ Council West Khasi Hills District, mynta ka sngi 18 tarik u Naiwieng, ka la ia kynduh ia u DC incharge ka WKH u P.D Sangma ban kyrpad ïa u ba un ailad noh ia baroh ki kali kamai paitbah ba kin iaid bad ban weng noh ia ka Odd bad Even Numbers.

Ka Seng ka la iakren ruh halor ka jingeh ba ki nongniah bad trai kali ki iakynduh ha kaba iadei bad ka jingshah dain kuna ki kali kamai kiba la kut permit bad ban ailad biang la kumno kumno haduh ba u kut u ne u snem 2021.

Shu shuh ka Seng ka la kyrpad ruh ia u DC ban ailad bad shah noh ia ki jingiaseng paidbah jong ki riew ngeit khristan namar ia kiwei kiwei ki tamasa la shah.

Ha kaba iadei bad kitei ki jingkyrpad ka HYC ha kaba iadei bad ka jingpyniaid odd bad even number ka ki kali kamai u DC u la kular ban sa pynnih noh ia ka hukum ban weng noh bad ha kaba iadei bad ki jingiaseng paidbah ki riew ngeit khristan u DC u la ai jingmut ba kin da pan jingbit shwa ban pynlong katba ha kaba iadei pat bad ka jingshah dain kuna ki kali bala kut permit u DC u la ong ba un sa iakren bad ki bor ba dei peit.