Weng noh ia ka ain CAA, dawa ka Agatha na ka kynhun NDA

New Delhi: Ka Agatha Sangma, MP jong ka Lok Sabbha bad ka nongialam jong ka National People’s Party, mynta ka sngi, ka dawa ban weng noh ia ka ain Citizenship (Amendment) Act (CAA). Ka Sangma, ka kren ia kata, ha ka jing ia kynduh ki kynhun synrop jong ka liang sorkar NDA, kiba ia kynduh, ha shwa ka jingsdang jong ka dorbar tlang jong ka Parliament.

“Namar ba la weng noh ia ka ain nongrep, da kaba pyrkhat, ia ka jingsngew jong u paidlang ka Ri, kumta nga kyrpad ia ka sorkar India, ba kan weng noh ruh ia ka ain CAA, da kaba buh ia kajuh ka jingsngew khamtam jong ki paidbah ka thain shatei lam mihngi” ong ka Agatha.

Ka sorkar kam shym la jubab eiei ruh em, halor katei ka phang, tangba ka la shah shkor, ia ka jingkren, ong ka Agatha.
“Nga kren ia kane, halor ka jingsngew jong ka seng jongnga bad jong u paidlang ka thain shatei lam mihngi” ka la ong shuh shuh.