Weng license ia u kontraktor, ba hap ka jingkieng: BJYM

Nongpoh, 26 Nailar:
Ka Bharatiya Janata Yuva Morcha (BJYM) Ri-Bhoi district ka la pynpaw ia ka jingbitar kaba khraw halor ka jingjia twa ka jingkieng kali na Pamlatar ban leit sha Mawlaho kaba la tei torti da ka tnat PWD, Umsning Division kumba la paw ha ki lad pathai khubor.
Ka BJYM na Ri-Bhoi ka dawa jur ruh ba ka tnat PWD ka dei ban weng noh ia ka license jong u kontraktor uba pyntrei ia katei ka jingkieng, kaba pyni ba um pat tbit ban pyntrei ia kat ka jingtei ia ka jingkieng kaba dei tang kito ki kontraktor kiba la tbit ba kin leh ia ka bad dawa ruh ba u kontraktor ba pyntwa ia katei ka jingkieng u dei ruh ban siew ia ka bai dawai sha kito ki nongtrei bylla kiba la mad ia ka jingmynsaw ha katei ka jingjia.
Ha ka jingialang ba kyrkieh ba la shong pyrkhat kam ha ka 26 tarik Nailar ha Umsning, ka la shim ia ka rai ban dawa na ka tnat PWD, Umsning Division ba ka dei ban pynshai paidbah ha ki kot khubor halor katei ka jingjia twa kynsan ka jingkieng kali na Pamlatar ban leit sha Mawlaho bad la aipor ruh ia ka PWD ba ka dei ban pynshai hapoh ka 31 tarik Nailar, 2016 lym kumta ka BJYM Ri-Bhoi district kam banse ban wad jingtip lyngba ka hok wad jingtip paidbah na katei ka tnat ba ka dei ban jubab katkum ka Right to Information (RTI).
Ka BJYM (BJP Youth Wing) Ri-Bhoi district ka la pynpaw ia ka jingbitar halor ka jingtrei torti kumba la kynnoh ia katei ka jingkieng kat haduh ba ka la twa bad pynpaw ruh ba ka jingtwa jong katei ka jingkieng ka dei ba la ai trei ha ki kontraktor bym pat tbit ban tei ia kat ka jingkieng kali, bad donbok ruh ba dang shu sdang tei la twa hynrei lada la dep tei bad pyniaid kali, kaei ka ban jia ia ki briew ba shong ha ki kali lada katei ka jingkieng ka twa ha kaba kum kata ka por.
Halor katei ka jingjia, ka BJYM na Ri-Bhoi hapoh ka jingialam u Bah C.G.R Syngkli, President ka la shim ia ka rai ban wad jingpynshai na katei ka tnat PWD hapoh ka hynriew ba ka dei ban jubab bad lada kam lah ban jubab hapoh ka 31 tarik Nailar, ka BJP Youth Wing ka la long kaba la pynkhreh ban wad da ka jingtip ia ka hok ki paidbah, ne ka RTI ba katei ka tnat kan jubab, ha kaba yn phah ia ka RTI ha ka 31 tarik Nailar, kata lada ym ioh ia kano kano ka jingpynshai.