![](https://www.urupang.com/wp-content/uploads/2023/11/DSC00679-14.jpg)
Shillong: Mynhynnin ka sngi ki samla pule ka North Eastern Hills University (NEHU) hapoh ka lama ka NEHUSU kila leit tur puk sha kamra u Vice Chancellor u Prof. Prabha Shankar Shukla ban dawa weng kam hapoh lai sngi ia u Nantu Das uba dei u Assistant Registrar (Security) bad peit ruh kum u u la shah kynnoh leh kynshlein ia kawei ka samla pule.
Ki samla pule ki la khang tala ruh ia ka kamra ophis jong u.
Ki la ujor ejahar ruh pyrshah ia u halor kane ka jingkynnoh ba u la leh kynshlein ia ka samla bad kila kyntu ia ki pulit ban pynsted ban kem ia u. “Ngi la khang tala ia ka ophis u Nantu Das, ngi kyrpad ia ki pulit bad ia ka kashari ban pynioh ia ka jingbishar hok. Lada don kiba iakynduh kum ia kane, ki dei ban wan shakhmat sha ka Union ba kan iarap”, la ong kawei ka samla pule.
Na ka liang u VC u la kular ban bishar bniah ia kane ka jingdawa ka NEHUSU bad un sa ai ia ka rai hapoh kane ka lai sngi halor kane ka jingdawa ban weng kam ia u.
Shwa ban leit rung sha kamra u VC bad ban khang tala ia ka kamra u Nantu, ki samla pule kila pyrta shla artad ter ter. Ka la don ruh ka jingiapyni nia bad u VC hynrei hadien, ula kular ban peit ia ka jingdawa jongki katkum ki rule.
Ha kajuh ka por, ka Khasi Students Union (KSU) NEHU Unit ka la ujor sha u Vice Chancellor ban weng kam ia u Nantu Das kum u Assistant Director ka Sports jong ka skulbah NEHU.
Haba kren sha ki lad pathai khubor hadien ka jingiakynduh ia u VC u Prof P Shukla, u General Secretary ka KSU NEHU Unit u samla Rudolf Chyne, u la ong ba ka jingleit ia kynduh jong ki ia u VC ka long ban ujor halor ka jingjia ka kaba la jia ha ka janmiet jong ka 19 tarik Naiwieng, ha kaba kawei ka samla kynthei ka la shah thombor ha u bar jylla u Nantu Das.
Na ka liang jong u Vice Chancellor, u la pan por ba hapoh ka shisngi arsngi yn sa shim ia ka rai ban weng kam ia u, la ong u General Secretary ka KSU NEHU Unit.
“Ngi dawa ba dei ban weng ia u Natu Das na baroh ki kam ba u bat, tad haduh ban da dep ka jingtohkit,” ong u samla Chyne.
Katkum ka jingiathuh u General Secretary ka KSU NEHU Unit, “Une u Nantu Das u la leit shaw ia kane ka kynthei na Umshypi bad u la sdang ban jrong kti ha kali bad ynda la poi ha Kiang nangbah Guest House NEHU u la sdang biang ban jrong kti bad na ka liang kane ka kynthei ka la iaksaid bad da ka jingdon ryngkat u Blei, ka la lait na ka jingshah thombor ha une u bar jylla.”
“Haba iadei bad kane, na ka liang jong ki bahaiing hasem jong kane ka kynthei, ki la leit ban ujor ejahar ha Mawlai Mawkynroh Police Outpost ban ujor pyrshah ia une,” la ong u samla Chyne.
Shuh shuh katkum ka jingiathuh u General Secretary, u Nantu Das hynnin ka janmiet u la shah kem ha ki bor pulit bad mynta u dang don hapdeng ka jingshah tohkit .
Halor kane ka jingjia, na ka liang ka seng ka pynrem jur ia ka jingleh jong une u bar jylla uba la ktah kti ia ka riew kynthei bad ka la byrnngem ba lada ki bor pyniaid ka NEHU kim leh eiei halor kane ka jingjia, kim banse ban shim noh da kiwei ki lad ki lynti.
Phi don ban ong eiei?