Weng ka Wahingdoh, na ka lympung I-League

Shillong, 22 Naiwieng:  Ka khubor ba sngew ia ki paidbah khamtam ki nongkyrshan ka kynhun ialehkai ba paw nam na kane ka jylla ka Royal Wahingdoh Football Club (RWFC) ka la pynkyndit thret mynta ha kaba ki bor pyniaid kane ka kynhun ki la rai ban weng noh ban don ha kane ka lympung  ialehkai kynjatbol ba heh tam ha ka ri kaba ju tip kum ka I-League.
Ka Wahingdoh ka dei ka kynhun ïalehkai kaba lai na kane ka jylla ban ïoh ban ïakhun ha ka I.League ha ka aiom ïalehkai kaba la dep hynrei kaba ar hadien ka Rangdajied ban ialehkai shuh ha kane ka lympung na ka bynta ka aiom ïalehkai kaban wan.
Ha ka jingpynlait khubor, ka klob  ka la ong ba ka daw ka jingbym treh ban dang bteng shuh ha kane ka lympung ka dei hadien ba ka la lap bad shem ïa katta ka jingbym don satia katta ka  thong kaba janai ha ka I.League  ba kan dang bteng ba kan ïakhun ha kane ka lympung.
Ka klob Royal Wahingdoh  ha ka sien jam ba nyngkong ka la lah ban bat ïalade ha ka kyrdai kaba lai jong kane ka lympung ïakhun hapoh ka jingialam ka jong u Santosh Kashyap mynta u snem.
“Ngi sngew ba kam sngew ba kam don jingmut ban shu theh kai ia ka spah ha ka I. League, namar ba ka lympung ïakhun ka I. League kam don satia ha ka ïa ka thong, watla ka long  kaba eh ïa ngi ba ngin shim ïa kane ka rai kut ban nym treh shuh ban dang ïakhun ha kane ka lympung”, la ong ka klob.
Hynrei ha kajuh ka por, ka klob ka la ong ba ka sngewkmen  namar kan ïai bteng ban ïai kyntiew bad ban kyrshan ïa kane ka jingïalehkai da kaba pynkhreh ban kyntiew ïala ki samla ïalehkai.
Ka klob ka kwah  ba kan ai khublei ïa baroh kiba la don bynta lang bad ka ban ïarap ban kyrshan, kane ka kynthup ïa ka All India Football Federation, Meg-halaya Football Asso-ciation, Shillong Sports Association, Foot-ball  Solution, ki nongialehkai bad baroh ki klob ba ka la dep ba kan ïakhun pyrshah ha ka Second Division bad I. League.
Kham mynshwa, ar tylli ki kynhun ka Pune FC bad ka Bharat FC kim treh shuh ban iashim bynta ha kane ka aiom.
Ka kynhun thymmai ka dei ka DSK Shivajains, kaban shah jied ban iashim bynta nyngkong ha kane ka lympung ryngkat lang bad ki kynhun ialehkai kum ka Bengaluru FC, Mohan Bagan AC, East Bengal FC, Salgoacar FC, Sporting Clube de Goa, Shillong Lajong FC lem bad ka Aizawl FC.