Weng ka Supreme Court, ki pulit pahara ia U Umanath Singh

Shillong, 22 Lber:
Ka Supreme Court of India, ha ka jingshong bishar jong U Chief Justice of India, ha ryngkat bad u Justice DY Chandrachud bad U Justice Sanjay Kishan Kaul, ka la weng noh ia ka hukum jong U Chief Justice barim jong ka Meghalaya High Court, kaba ula pynmih hukum, ba ka sorkar Meghalaya, ka dei ban phah pahara pulit ia u, ha ka Z Category, wat ynda haba ula shongthait na katei ka kam ruh.
Katei ka jing ia said ka poi sha ka Supreme Court, hadien ba la mudui da U Bah Sajay Laloo ban ujor pyrshah halor katei ka rai, kaba la rai da ka Division Bench jong ka Meghalaya High Court, ha kaba la khlieh da U Umanath Singh, ha kaba ula hukum ia ka sorkar Jylla bad ka sorkar India ruh kumjuh, ba ki dei ban ai jingiada ia u bad kumjuh ia kiwei de ki nongbishar, da kaba kin ia syllok lem bad kitei ki nongbishar. Na ka jingwad jingtip jong ki tnat syntiat jong ka sorkar Meghalaya bad ka sorkar India ruh kumjuh, kim shym la lap satia, ba utei u nongbishar barim, u don jingma ia ka jingim jongu, wat la mynta, u ioh ia ka jing iada na uwei u pulit PSO, ha ka jaka sah jongu ha Noida. Dang shen ka Supreme Court, ka la kyntait ruh ia ka hukum jong ka Rajasthan High Court, kaba bthah ba ym ju dei ban talasi ia ki nongbishar, haba ki leit jingleit da ka liengsuin, ha ki kad liengsuin bapher jong ka Ri India.