Shillong: Hadien ka jing pynbna ban nym leit lum khubor, na ka North East Olympic Games 2022, ba la pynbna da ka Meghalaya Editor’s and Publisher’s Association (MEPA), ka Seng ka la iakynduh myn hynnin ka sngi, ia u Vijay Kumar, Commissioner and Secretary finance jong ka Sorkar jylla ban iakren halor ki mat bad ban ia pynbeit ia ki jing dawa jong ka MEPA.
Haba ki nong ialam jong ka MEPA ryngkat ki 8ngut ki dkhot ha ka jingialam jong U President, Bah R Monarch Shabong bad u General secretary jong ka Seng bah John W Thabah, ki la leit ban iakynduh ia u Kumar ha ka ophis treikam jong u.
Haba iakren ia ka mat, ki nongmihkhmat na ka kynhun jong ka MEPA ki la kyntu ia u Kumar ba un peit bniah ia ka jingleh shiliang, ba la shim da ka sorkar jylla haba ia dei bad ka jingpynbna, ba iadei bad ka North East Olympic games 2022 bad ka jing ailad kham bun sha ki kot khubor ba na bar jylla.
Ka kynhun ka la dawa ba ka sorkar ka dei ban phai khmat nyngkong sha ki kot khubor na jylla lajong ban ia ryngkat lang.
U Kumar u la kubur ba un shimkhia haba iadei bad ka jing dawa jong ka MEPA bad u la kular ba ki jing ai jingtip haba iadei bad ka North East Olympic games 2022, yn sa ai ia baroh ki kot khubor jong ka jylla khlem da don ka jing peit khmat ne jingiapher bad u la kyrpad ruh ia ka MEPA ba kan weng noh ia ka jing sahngeh lum khubor jong ki.
Hadien ka jing seisoh jong ka jing iakren, ka MEPA ka la rai ban weng noh ia ka jing sangeh lum khubor jong ki na ka North East Olympic games 2022, kaba la pynlong ha Shillong.
Phi don ban ong eiei?