Weng ka KHADC ia ka jinglong myntri u Bah Nongkhlaw

Shillong, 13 Naiwieng:
Ka KHADC ka la weng noh ia ka jinglong myntri jong u Bah Jamphang Nongkhlaw namar ba ka jinglong myntri jongu ha ka Hima Mylliem, kam long katkum ka ain ka KHADC bad khlem ka jingtip lang jong ka Kur Nongkhlaw.
Ha ka hukum kaba pynmih ha ka 3 tarik Naiwieng, 2016, ka KHADC ka la ong ba ka Seng Kur Nongkhlaw ka la ujor sha ka KHADC ba ka jinglong myntri jong u Bah Jamphang ba la shu jied tang ka Kur Nongkhlaw Rngi SawKpoh hynrei katkum ka rukom ka riti dustur dei ban jied da ka Kur Nongkhlaw baroh hapoh ka Hima Mylliem. Ka Seng Kur Nongkhlaw kala ujor ruh ba kam don satia kano kano ka jingpynbna sha baroh ki dkhot ka Kur ban don ka jingjied myntri, bad la shu thung hi da u Syiem.
Halor kane ka nongrim ka KHADC ka la shim ba kam long kaba dei bad kaba iaid lait ia ka rukom jied myntri bad ka la weng noh shwa ia ka jinglong myntri jong u Bah Jamphang.
Hadien ba la bishar ia ka ain thungkam longheh ka Hima Mylliem ka KHADC (appointment and Succession of Syiem, Deputy Syiem, eectors and Rangbah Shnong of Mylliem Syiemship) Act 2007, ka KHADC, ka la pynskhem ba ka jingthung myntri ia u Bah Jamphang ka la pynduh noh bad ka hukum ia u Syiem da ka jingiasyllok bad ka Seng Kur Nongkhlaw ban thaw ia ki lad ki lynti ban pynlong ia ka elekshon jied myntri ba thymmai ha kaba baroh ki Kur Nongkhlaw kin iashim bynta katkum ka riti dustur ka Hima Mylliem.