Weng ka KHADC, ia 7 tylli ki shnong na ka Town Committee

Shillong:U Executive Member In charge jong ka Town Commitee, u bah Paul Lyngdoh myn hynnin ka sngi, u la iathuh ba ha ka jingialang ka EC jong ka KHADC ka la shim ia ka rai ban weng noh ia ki 7 tylli ki shnong na ka jingshah pynhap hapoh ka Town Commitee.

Haba ia kren bad ki lad pathai khubor, na ka liang U Bah Paul Lyngdoh u la iathuh ba kane ka rai ba la shim mynta ha ka jingialang ka long hadien ka jingwan kyrpad jong ki 7 tylli ki shnong ban weng noh ia ki na ka jingshah pynhap hapoh ka Town Commitee shuwa ban sdang ka thoh khana samari na ka bynta u snem 20-21.

U la iathuh ba ha kine ki khyndiat bnai ki nongialam jong ki Town Commitee jong ki 7 tylli ki shnong ki la wan ban kyrpad na ka Council bad ka ne ka jingkyrpad jong ki long hadien ba ki la ioh jingtip ba kan don ka jingsdang ban thoh ia ka khana Samari. Kine ki 7 tylli ki shnong ki kynthup ia ka Nongpoh kaba la kyrpad ban weng ia ki 8 tylli ki shnong kiba la pynhap ha ka ne ka Commitee.Ka Nongstoin la weng lut ia ki shnong lait noh ia ki 10 tylli ki shnong kiba la pynhap hapoh jong kane ka Town Commitee bad ki wei ki ba la weng naka jingpynhap hapoh ka Town Commitee ka dei ka Mawkyrwat, Sohiong,Umsning, Mairang bad ka Mawlai.U la iathuh ruh ba ka jingmyntoi jong ki shnong ki ba la weng na ka jingshah pynhap hapoh ka Town Commitee ka long na ka bynta ki skim kiba wan na ka bynta ka Urban area kiba wan na ka Sorkar India.