Shillong, 16’lyngkot:
Ka Kur Syiemlieh Sawkpoh, ka la dawa na ka KHADC ba ka dei ban weng noh ia u Syiem Maharam Syiemship, u pa’iem Niandro Syiemiong da ka jingkynnoh ba utei u Syiem u synshar donbor bad leh pyrshah ia ka aiñ ka riti dustur jong ka synshar Hima.
Haba kren sha ki nongthohkhubor mynta ka sngi u Joint Secretary ka kur Syiemlieh u bah Phamles Syiemlieh u la ong ba ka KHADC ka dei ban weng noh shipor ia une u Syiem bad ban thung shuwa da u Acting Syiem bad dei ban tohkit bniah shuwa ban lap ia baroh ki jingshisha. U la kynnoh ba la la lap ia ka kam bamsap jong utei u Syiem ha kaba ia dei bad ka khyndew ka shyiap bad ia kane u la ong ba la lap lyngba ka ain wad jingtip ka RTI.U la ong ba katkum ka jingwad jingtip ha ka 1 tarik Nailar 2014, la lap ia ki shibun ki kam kiba u Syiem Niandro ha ryngkat ka ophis jong u ki long pyrshah ia ka ain ka hima bad pyrshah ia ka hok ki riti dustur bad pyrshah ia ka Riti bat khyndew ka Hima. Ki kam bamsap utei u Syiem kiba u bah Phamles u la kdew ka dei halor ka jingai jaka sha ka sorkar khlem ka jingtip ka Hima. Haba iadei bad ka bhah 1/8 jong ka Hima sha ka KHADC, ka RTI ka kdew ba u Syiem ka Maharam um lah ban siew ia kane ka bhah sha ka KHADC namar ka jingdap ram jong ka Hima bad kumjuh ruh ka la kyrpad sha ka KHADC ba kan nym phah siew ia kane bhah.
La iathuh ba la pan jingtip ruh ha kaba ia dei bad ka South West Khasi Hills District Audit Report, bad katei ka ripod ka pyni ba ha u snem 2007- 2008, u Syiem u la kam ba u la leit siew ia katei ka bhah 1/8 hynrei katkum ka kaiphod ba ioh na ka KHADC la lap u syiem um shym la siew ia katei ka bhah sha ka KHADC bad ha u snem 2010- 2011 u la siew tang T. 35,607 tyngka . La kynnoh ba u Syiem u la weng jubor ruh ia ki Lyngdoh kiba don hapoh ka Hima kiba kynthup ia u Lyngdoh Khain Nongsynrieh u Rangbah Eden Nonglang, Lyngdoh Khain Sakwang u bah Reling Ramsiej bad Lyngdoh Khain Riwar u Rangbah Amstrong Sanglein. U bah Phamles Syiemlieh u la kynnoh ruh ba ki la lap ba u Syiem ka hima Maharam u la ai ei shi lyngkhot ka khyndew sha ka sorkar kata sha ka tnad Irrigation ha Panchiring, kawei ka jaka ha Ranikor sha ka tnad Pulit na bynta ban shna ia ka Ranikar Police Station bad u la die duh ia khyndew da kaba u kam ba ka dei ka jong ka hima da kaba u leit shim ia ka pisa na ka ophis u Deputy Commissioner, West Khasi Hills District kaba la siew da ka tnad PWD (Roads) ban shna ia ka surok na Umpung sha Ranikor. La kynnoh ruh ba u la die duh ia ka khyndew jong ka hima sha kiwei pat ki tnad sorkar ba kynthup ia ka tnad ka koit ka khiah, ka tnad jngohkai pyrthei, ka tnad ri jingri bad kiwei. La ong ba u Syiem um lah ban ai jingshai ha kaba ia dei bad ki skhim bapher bapher ba katei ka hima ka ioh na ki bor sorkar.
Phi don ban ong eiei?