Weng ia ki BSF na surok Sonapyrdi, dawa ka KSU na ka MLA

Shillong: Myn hynnin ka sngi ha ka jingwan ka kong Santa Mary Shylla MLA ka thaiñ Huroi, ka Khasi Students’ Union(K.S.U) Huroi unit, ka la iakynduh ban dawa pynkynriah mardor ia ki Border Security Force (BSF) kiba shong be aiñ ha surok Sonapyrdi.

Na ka liang jong ka Khasi Students’ Union (K.S.U) Huroi unit hapoh ka jingialam u President u Samla Wallam Lamin Gadew bad u Vice-president samla Gilbertstar Khonglah, ki la ioh ban ia kynduh markhmat ia ka MLA ka 5-Sutnga Saipung Constituency ka kong Santa Mary Shylla, ha ka jingwan jongka sha shnong Huroi bad na ka liang jong ka Seng ka la ioh ban pynsngew halor ka jingeh ki paitbah nongshong shnong jong ka thaiñ Border,naduh ka shnong Lejri, Lahaleiñ bad ka shnong Huroi, ha kaba iadei bad ka jingktieh shaba palat jong ka surok khamtam ban dawa pynkynriah mardor ia ki Border Security Force (BSF) kiba thaw ktem be ain ha jingkieng Sonapyrdi bad kiba juh pyndik man ka por ia ki paitbah ka thaiñ Border.

Na ka Liang jong ka kong Santa Mary Shylla ka la kular hakhmat Jong ka KSU ba kan shimkhia halor kane ka mat kaba ka seng ka la dawa bad ka la kular ruh ban shimkhia bad ban pynsngew sha ka sorkar jylla bad sha ki bor ba dei peit ia ka tnat home jong ka sorkar India ha kaba iadei bad ka ktem beain jong ki BSF ha Sonapyrdi bad ka la ong ruh ba kan ia trei ryngkat ryngkat lang halor kane ka mat jong ka jingdawa jong ka seng. Kum ban shu pynkynmaw ba ka jingdawa pynkynriah jong ka Seng ia kane ka ktem shipai ha Sonapyrdi kam dei shuh ka ba dang thymmai hynrei ka dei ka mat ka ba la dawa na ka por sha ka por, namar ha katei ka jaka kam dei shuh ka ba shngaiñ ia ki paitbah ha ka leit ka wan, namar ka jingleh donbor bad leh riewkhlaw ki ne ki shipai sha ba palat.