Weng Chairman ka Raij Nongjngi

Shillong,14 Nailur:
Ka Dorbar Raij Nongjngi, West Jaintia Hills District, ha ka jingialang jong ka, kaba la long ha kane ka 11 tarik mynta u bnai, ha LP Skul Thadlongpai Ionglwit, ha ka jingia don lang ki Rangbah shnong, ki riew rangbah bad ki paidbah khynthei bad shynrang, ka la rai da kawei ka jingmut ban weng noh shi syndon ia u Wilas Pale na ka kam Chairman uba long ruh u Pator ka Raij Nongjngi.
Ka daw ka jingweng noh ka Dorbar Raij Nongjngi ia u Wilas Pale, ka long hadien ba ka Dorbar kala lap ia ki daw kiba thikna ba ka jingpep noh ka jingiathep Vote Dolloi ka Elaka Nongjngi (Election Dolloi), ka dei ka jingai case ba marwei jong u pyrshah ia ka Jaintia Hills Autonomous District Council (JHADC), Jowai, khlem kano kano ka jingtip lyngba ka Raij Nongjngi. Kumta ha ka jaka u Wilas Pale Chairman, ka Dorbar Raij Nongjngi ka la jied ban long chairman ha ka jaka jong u da u Phlimingstone Khynriam uba long u Rangbah shnong ka shnong Lumtrep Nongjngi naduh katei ka sngi .
Na ka liang jong ki paidbah ka Raij Nongjngi ki la pynpaw ka jingsngewsih halor ka jingpep noh ka jingthep vote Dolloi ka Elaka, tang na ka daw u Wilas Pale marwei kaba la ktah jur ia ka kam shynshar khaddar ki paidbah bad khamtam ia ka Niam ka Rukom.
Kumta ki paidbah ka Raij ki kwah ba ka Elekshon kan iaid beit iaid ryntih khlem kano kano ka jingpyrshah, lada ka case u Wilas Pale bad ka JHADC kam pat dep ki paidbah ki kyrmen baka Election Doloi kan long kaba iaid beit iaid ryntih, khnang ba ka Elaka kan ioh noh kloi ia u Dolloi ba pura hadien ka jingduh noh ia u Dolloi jong ka Elaka u ma (L) L.Snieh la shisnem tam ei ei mynta.