Shillong, 16 Iaiong:
Hadien ba ka la mih ka jingiakynnad hapdeng ki jaidbynriew Khasi bad Garo ha ka shnong Kulang, hadien ka jingshah pyniap ki ar ngut ki briewkiba shah kynnoh nonglute ha ka shnong Kulang, ka KSU Ranikor Circle kala kyntu iaki paradoh parasnam (Khasi) ba kim dei ban sheptieng.
U General Secretary ka KSU Ranikor Circle Samla Pynshngain Syiemlieh ha ka kyrwoh kaba ula pyllait ula kyntu iaki Khasi kiba shong ba sah ha katei ka shnong bad ka thain ba kim dei ban sngew sheptieng la ha ka leit ka wan, ka iaid ka ieng ka trei ka ktah, da kaba ki dei ban iaid la ka jongka lyti.
Shuh shuh ula kyntu ba lada don kino kino kiba pynthut iaka iaid ka ieng, ka trei ka ktah ki dei ban pyntip mardor sha ka seng khnang ba kan leh ia kaba donkam. Ula ong ruh ba kum ki para Khasi kim dei satia ba salia ne sngew sheptieng hynrei ki dei ban long kiba ieng hala ka jong ka nongrim.
Ha ka juh ka por ka seng ka kwah ba ka shongsuk shongsaiñ kan wan biang ha katei ka thaiñ bad ka la kyntu ia ki jaidbynriew Garo kiba la mih noh ba ki dei ban wan phai biang sha ki shnong Khasi, kumjuh ruh ia ki khynnah skul ba kin wan ban bteng biang ia ka jingpule jong ki.
Ka seng ka la kyntu ruh ia ki Rangbah shnong, ki nongialam shnong Garo ba kim dei ban shah ialam bakla hynrei ki dei ban tem ia kane ka jingjia.
Ban shu kdew ba kane ka jingiakynad ka la mih ha ka 14 tarik mynta bnai, hadien ka jingshah pyniap jong kiba la shah kynnoh ba ki dei ki nonglute kiba dei ki Garo ha kawei ka par dewiong kaba jngai kumba 5 km na shnong Kulang bad kane ka la jia ha ka 2 tarik mynta u bnai. Ka KSU ka la kyntu ruh Garo kiba shong ba sah ha
katei ka thaiñ ba kim dei ban shu kynnoh ia ki Khasi halor ka jingiap jong kitei ki ar ngut hynrei ki dei ban da pynthikna namar ioh dei kaba la leh da ki para nongbylla.
Ka seng ka la shimkhia halor kane ka jingjia namar kam kwah ban don ka jingsngewpher jaidbynriew. Ka KSU ka pynpaw ka jingsngewlem ruh sha kiba haiing hasem jong kito kiba shah pyniap bad la pynrem ia kito ki briew kiba la shim ia ka ain ha ka kti lajong.
Phi don ban ong eiei?