Wat tieng, mih ban rakhe sngi Laitluid, ong U Mukul

Shillong, 13 Nailar:
Namar ka jingkynjah ka jingrakhe sngi laitluid ha ki snem ba la dep ha kane jylla na ka jingkhot pakhang shnong ki seng lehnoh, na ka liang u Myn tri Rangbah ka jylla u Dr Mukul Sangma u la kyntu ia ki paidbah ban mih shakhmat ban leh kmen ia kane ka sngi ba khraw ka ri khlem jing sheptieng ei ei.
U Myntri Rangbah u la khot ia ki paidbah watla khadwei tylli ki seng lehnoh ha kane ka thain shatei lammihngi ka India kynthup ka Hynniewtep National Liberation Council (HNLC) ka khot pakhang shnong ha kane ka sngi laitluid.
U la ong ba ki bor synshar district ki la pynbiang ia ki bor iada bad ki jingialang la pynlong ha ka kyrdan u Chief Secretary bad u Director General of Police ban pynthikna ba kane ka sngi kan long kaba kmen bad kaba suk kaba sain.
“Ki paidbah ki dei ban mih shakhmat ban iashim bynta ha ka jingrakhe ha ka rukom kaba shongkun” la ong u Myntri Rangbah ka jylla ha ki nongthoh khubor bad bynrap ba ka jingrakhe ka kham shongkun ha ki jaka sha nongkyndong namar ka jingiamih paidbah ki briew.
Katkum ka jingong u Dr Mukul, ki prokram bapher bapher la pynkhreh na ka bynta kane ka sngi ha baroh ki district kynthup ha ka nongbah bad ka sorkar ka la mang pisa kyrpang na ka bynta kane ka sngi.
“Lyngba kane ka sngi ngi la ailad ban pyni ia ka synshar paidbah kumba la aiti bad lenlada da ki nongialam ka ri ban ioh ia ka jinglaitluid”, la ong u Dr Mukul.