Wat thang dhup, theh dud ne buh syntiew “, ong ki 3 seng rBa leh Yatra ki hindu ha Mawjymbuin Mawsynram

Shillong, 21 Nailur:  Ka Joint Action Committee (JAC) jong ki lai sengbhalang ha Mawsynram ba kynthup ia ka KSU Mawsynram Circle, FKJGP Mawsynram Circle bad ka HYC Mawsynram Circle, ki la buh da ki kyndon ia ki riew ngeit niam Hindu kiba la thmu ban iaid Yatra lashai ka sngi da kaba iaid kjat naduh Shil long shaduh Mawjym buin, Mawsynram ba kim dei ban leit thang dhup, ne theh dud lane ban  buh syntiew hapoh ka krem Mawjymbuin.  U nongialam jong kitei ki 3 seng u bah Morgan J Lyngdoh haba kren sha ki nongthohkhubor mynta ka sngi, ula ong ba ki 3 seng ki la buh ia katei ka jingmaham  namar ba kim kwah ba ka krem Mawjymbuin kaba dei ka jaka jngohkai pyrthei kaba la pawnam kan jaboh na katei ka jingleh niam ki khar Hindu, hynrei u la ong ba la shah sngewbha ia ki, ba kin wan tang kum ki nongjngohkai pyrthei ym ban wan leh niam leh rukom namar ba ka jingleh niam leh rukom jong ki kan pynsalia pat ia kiwei pat ki nongwan jngohkai pyrthei kiba wan sha katei ka jaka. “Katei kam dei ka jaka leh niam jongno re jongno hynrei ka dei ka jaka jngohkai pyrthei , lada ki wan ki hap ban wan tang kum ki nongjngohkai pyrthei bad ki lah ruh ban shu duwai phirat, ym ban thang dhup, buh syntiew ne ban theh dud” ong u bah Morgan J Lyngdoh. U President ka FKJGP u ba Banshan Marbaniang u la ong naduh ki khnatang la ju tip ia katei ka krem kum ka jaka shong ki basa kiba kyrkhu kyrdoh ia ka iew ka hat ha Mawsynram kaba la ju tip ruh kum ka jaka wan iew ka puri blei, hynrei ki khar Hindu ki la pynkylla kyrteng ia ka kum ka jaka shong jaka sah u blei jong ki kaba ki khot ka ‘Shiva Linga’. U la ong ba ha u snem 2006 la sdang nyngkong eh ia katei ka jingiaid Yatra kaba la tip kum ka Mawsynram Yatra hynrei mynta u ong ba la pynjah kyrteng ia ka Maw synram bad la khot noh da ka Yatra, “Ngim tip shuh kaei ka jingthmu kaba sha lyndet jong ki , ngi tieng ioh ba ka krem Mawjymbuin hadien kan sa kylla Man dir pynban kum ka jaka jngohkai pyrthei kaba don ha 101 Area ha ki por ba mynshuwa” ong u bah Banshan Marbaniang haba kren sha ki nongthohkhubor. Kat kum ka ingiathuh kitei ki nongialam jong ki 3 seng ki la ong ba ha ki snem kiba la dep la ju pan jingbit na ki bor shnong ban pynlong ia katei ka jingiaid pilkrim sha Mawjymbuin, hynrei mynta u snem la shu pyntip ia u Rangbah Shnong ba kan don katei ka jingiaid Yatra. Shuh shuh u la ong ba haba katei ka seng ka wad jingtip na ka tnad jngohkai pyrthei la ka don jingtip ne em ia katei ka jingiaid Yatra u bah Banshan u la ong ba ka tnad jngohkai pyrthei kam don jingtip eiei ruh em. Ki  nongialam katei ka seng ki la ong ba baroh kiba thmu ban pynlong prokrma ha Mawjymbuin lait noh ka kam jngohkai pyrthei ki dei ban pyntip sha ka bor shnong ki prokram aiu ki don jingthmu ban leh khnang ba ki bor shnong kin ioh ban bishar la kaba long ne-em ban ailad ia ki. Kitei ki 3 seng ki la ong ruh ba ki ia trei ryngkat ryngkat bad ka bor shnong Mawsynram halor katei ka bynta ka jingiaid Yatra ki niam hindu ha kaba u ba Morgan u la ong ba ki dkhot jong ki 3 seng lashai ka sngi kin leit ban pahara ia katei ka jaka ioh ka don ka jingpynkhein na ki nong iaid Yatra ka niam hindu ia katei ka kyndon jong ki.