“Wat sngewpoh” ong U Bah Sanbor ia ki nongsar

Shillong, 2 Risaw:
Ha ka sngi saitjaiñ jong ka taiew ka Greater Laban Community Development Society (GLCDS) ka la pynkup burom ia ki nongtrei ba rit jong ka Shillong Municipal Board bad ki nongtrei jong ka Cantonment Board da kaba ithuh ia ka kam jong ki kum ka kam kaba kor ne ka ‘Novel Service award-2016’.
Ha katei ka sngi katei ka Society ka la sam khusnam sha ki 151 ngut ki nongtrei na kitei ki ar tylli ki Board, ki nongtrei kiba la shah pynkupburom ki kynthup ia ki nongsar surok ,ki nongniah kali bad kiwei pat ki nongtrei ia kijait kam barit. La sam khusnam ruh sha kitei ki ar tylli ki Board da u kongsan u bah Sanbor Shullai bad la wan ban shimti da ki ophisar jong kitei ki Board.
Haba kren ha katei ka sngi u bah Sanbor Shullai MLA ka 19th Shillong South konstitwensi u la ong ba ka dei ban kheiñ kor ia ki kam ba kitei ki nongtrei ba rit ki trei namar dei lyngba jong ki ba ka imlang sahlang ka ioh jingmyntoi.
Ula ong ia ki ba kim dei ban don ka jingsngewpher halade ba ki dei kiba shah niew bein ha ka pyrthei, “Phim dei ban sngew poh ialade, ki kam ba phi trei ki dei ki kam kiba khraw,phi kham khraw ma phi ban ia nga u MLA ruh” ong u bah Sanbor.