Wat slem ioh kylla Wahumkhrah, Umshyrpi ka Umjasai rBa ieng ka Temple ha Madhu khula, 3 mer

Shillong, 9 Lber:
U bah PM Syiem MLA barim ka Mylliem Konstitwensi u la phah shithi sha u myntri ka tnad khlaw ka jylla u bah Prestone Tynsong, bad ha katei ka shithi u la pyntip ia ka jingleh jaboh ia ka Umjasai bad ka jingdakhol jaka ki briew da kaba shna dukan ha lynti iaid sha khlaw jong ka tnad khlaw ka jylla bad sha Temple Madhu khula kaba don ha 3 mer, Upper Shillong.
Ha ka shithi u la ong ia u myntri ban weng shi syndon ia kito ki nong dakhol jaka da kaba shan dukan ha ka jaka jong ka tnad khlaw kiba long ki dawbah ban pynjaboh ia ka umjasai kaba dang khuid khlir khlir. “Wat pynslem shuh ioh ka kylla long kum ka Wahumkhrah, Umshyrpi , namar ka Umjasai kam jngai na ka Wah Umshyrpi” ong u bah syiem ha ka shithi sha u myntri. U la kyntu ruh ia ka sorkar ba ka dei ban ia kren bad ki bor ba peit ia ka Temple ban ym shah pynjaboh ia kane ka jaka namarba baroh ki jaboh ki leit beit sha ka wah bad namarba la shu pynlang ha khmat ka ing mane blei. “Lada ym kyndang lut ia baroh ki dukan be-ain kiba la shna ha ka jaka bad u pud ka tnad khlaw , la jwat ban ban weng noh hadien’ ong ka kyrwoh na u bah P.M Syiem.