‘Wat shah ialam bakla ha u Rangbah Khliehtyrshi: JSU, JYF

Jowai, 16 Ialong:
Ki ar tylli ki seng bhalang ba paw ha ri lum Jaintia, ka Jaintia Youth Federation (JYF) bad ka Jaintia Students’ Union (JSU) haba pynrem jur ia ka jinglehbor bad knieh jubor u rangbah shnong bad ka kynhun jong u ia ki jaka puta jong ki katto katne ngut ki longkmie ha katei ka shnong, ka la buh ka jingkyntu ia ki paidbah nongshong shnong ka shnong Khliehtyrshi ba nym long ki ba shah ialam bakla ha utei u rangbah shnong bad ka kynhun jong u.
Kitei ki ar tylli ki seng haba iakren bad ki nongthoh khubor ki la pynpaw ia jingsngewphylla ba kumno u rangbah shnong uba synshar ia ka shnong khamtam ban peit ia ka bha ka miat bad ka shongsuk shongsain u klun jubor pynban ia ki jaka puta jong ki paidbah.  
Utei u rangbah shnong ha ryngkat ka kynhun jong u ki la knieh jubor ia ki jaka jong ka kong Stella Dkhar ki khun jong ka, ka kong S Charity Dkhar, S. Lakhonty Dkhar bad ka kong Dita Phawa.
“Ha ka jingiakynduh kitei ki trai jaka ia ngi ki ar seng, ki la pyni ia ngi ki kot ki sla kiba kynthup ia ka Land Holding Certificate bad Patta bad haba la bishar bniah ngi lap ba ki dei ki ba biang katkum ai da ka ophis jong ka JHADC”, la ong u Heibormi Symblai, Education Secretary ka JSU.
Utei u samla u la bynrap ruh nalor kitei ki kot ki sla, kitei ki trai jaka ki la ioh ruh ia ka hukum jong ka District Council Court kaba la mana pyrshah ia u rangbah shnong bad ia ka kynhun jong u ban rung ne pyndonkam ne pynjot pynpra ia kitei ki jaka, hynrei u tei u nongialam shnong bad ki briew jong u ki la iaid lait ia kane da kaba pynkhein ruh wat ia ka hukum jong ka iing bishar.
“Lada kum u nongialam shnong u lehbor, thombor bad knieh jubor ia ka hok jong kiba rit ba ria khlem da burom shuh wat ia ka iing bishar, kumno u duk u suk un ioh iala ka hok jong u ha ka imlang ka sahlang?”, la kren bynniaw u Education Secretary ka JYF, u samla Brightstar Chyrmang.
Na ka liang kitei ki ar seng ki la kyntu ia ki bor district ban iada ia ka hok ki longkmie, ki rit ki ria bad u duk u suk na kum kitei ki riew donbor kiba hun ban klun ia ka hok ka kynti jong ki.