Wat rung ha shnong, ong ka Smit ia ki nongtyrwa tiar

Shillong, 18 Jylliew:
Ka Executive Committee ka Smit pyllun ka la mana ia ki nong tyrwa tiar la ki dei ki dkhar ne ki Khasi ruh ba kin rung katba mon sha ki kyndong kynshrot jong ka shnong. Katei ka jingmaham ka dei hadien ba kawei ka longkmie na ka Umlynghong ka la shah ot kti bad shah ot shkor ha uwei u khar tyrwa tiar tang ban ioh rong ei ia ki jingdeng ksiar jong ka.
Haba ia kren bad u Rupang u sordar ka Smit u bah Kynsai M Syiem u la ong ba ka Executive Committee ka la mana naduh ki nongwan tyrwa tiar lane ki Khasi ruh kiba wan thied tin jot ba kim dei shuh ban rung hapoh ki shnong ki thaw nangne shakhmat bad ka jaka ia die ia thied jong ki kan dei beit tang ha iew bad yn ym shah ba kin leit ban rung sha ing ki briew. Ia kane u sordar u la ong ba la dep ban ia kren ruh bad ki bor pulit ba kim dei ban shah ia kiba kum kitei ki nong tyrwa ba kin rung naduh Lad Smit ioh ba kan jia kano kano kaba sngewsih.
U sordar u la ong ba katei ka jingmaham kam dei shuh kaba dang phylla, hynrei kaba la don lypa shuwa ban jia ka jingjia ia ka longkmie na ka shnong Umlynghong ruh hynrei u la ong ba ki paidbah kim shimkhia hi ia katei ka jingmana. Ka Executive Committee ka la pynrem jur halr ka jingthom bor u bar jylla ia katei ka longkmie bad ka la pynpaw ruh ka jingsngewlem sha ki bahaing hasem bad ka la dawa na ki bor jong ka aiñ ba ki dei ban kem ia utei u bar jylla.