Wat pynthut ia ki trok kiba wan kit mar rep

Shillong:U Symbud Myntri rangbah ka jylla u bah Prestone Tynsong, haba ia kren bad ki lad pathai khubor u la iathuh ba na ka liang ka sorkar jylla mynta ka sngi ka bthah ia ki bor jong ka District Administration ba kin peit ba kan ym don kano kano ka jingpyn wit ne pynthut ia ki truck ki ba wan ban kit ia ki mar rep na kane ka jylla.

Kane ka long hadien ba la don ki jingujor ba ki dang don na ki truck kiba wan ban kit ia ki mar rep na ka jylla ki dang shah pynthut ha ki katto katne ki shnong.U bah Prestone u la ong ba kine ki truck kiba wan na shabar ka jylla ban kit ia ki jhur na kane ka jylla ki dei ki ba wan rung na ki entry point kumta ki dei kiba bud ia ki kyndon jong ka tnad ka koit ka khiah.

Na ka liang u bah Prestone u la kyntu ia ki katto katne ki shnong ba kim dei ban pynwit ne pynthut ia kine ki truck namar ba ki ne ki truck ki wan ban kit ia ki mar rep  na kane ka jylla, namar ba kan pynduh nong ia u nongrep u ba la dei ka por ban die ia ki mar ki ba ki rep.