Ka jingiakren halor ka jingkhapngiah (Congestion) jong ka surok ha Sor Shillong ka la thnam bha ha kine ki por mynta. Kat shaba leit kat sha ba wan, ym don ba lah ban kiar na ka jingsah kut blok kali (Traffic jam). Kane ka dheng kali ka la long shaba palat pud bad ka la long ka daw (cause) jong ka jingslem sha ki kam ki jam baroh. Lada phi kylli balei ki slem, ym don da kiwei pat ki daw lait noh ka dheng kali. Bun ruh ki la shu tei pop ia kane ka dheng kali lada jia ba ki slem sha ki kam ki duk jong ki.
Ki jingbun ki kali ha Shillong bad ha kylleng ka Ri Khasi bad Jaintia ka la long ka dak ka shin ba ngi la ia roi ia par ha ka ioh ka kot, ka khaii ka pateng bad ka kamai kajih. Ngim shym la duna shuh lada ia nujor bad kiwei kiwei ki sor bah jong ka Ri India. Tang ki jingioh kam ioh jam ki driver ruh kam dei shuh kaba kai bad ka long ka jingkyrkhu ia ka iing ka sem jong ki, ba ki lah ban pyndap pynbiang lyngba kane ka kam driver.
Hynrei, kaba kham sngew mong eh ka long ba, katba nang bun ki kali, ki surok pat ki neh bad sah hi kumjuh. Bun ki shu ia kren tang ka ktien ban pyllait ia ka dheng kali katba ka kam pat ka nang jngai nang jngai pynban. Ngim kwah satia ba ka surok ha ka Sor Shillong kan long pynban kum ka khoh, ka heh bad iar na kylleng ki jaka kiba wan sha Shillong katba ynda poi Shillong pat ki ia thngian (rush) la kum ka trai jong ka khoh kaba rit bad ba khim shibun. Lada kwah ba ka Shillong kan lait na ka jingkhapngiah kali, dei ban plan bha ban don ki surok sawdong jong ka. Don bun ki lad ki lynti lada ka Sorkar ka mon. (Haba don ka mon, hangta ka lynti ruh ka don).
Ka Shillong Bye-pass na Damsite sha Jowai ka la ia rap shisha shibun ia ka jingkhapngiah ka Sor Shillong khamtam ki kali kit jingkit. Hynrei sa kawei pat ka surok Bye –Pass donkam na Damsite ne Mawiong sha surok Dawki/Sohra ban poi sha 7mer. Kane ka surok kan iaid na sharum Mawlai, Mawprem lyngba ki rud wah Umshyrpi-Wahumkhrah shaduh 3mer/Nongkseh/Nongumlong haduh 7mer. Ki kali kiba wan na Guwahati sha Dawki ne Sohra kim donkam shuh ban iaid lyngba ka Shillong. Na Laitkor – Lumparing ter ter lyngba ki kjat lum Shillong haduh 7mer ruh ka donkam bha ban pyniasnoh noh lyngba ka surok kali. Kam don jingeh ruh ban pynia snoh ia ka surok na Mawlai Mawiong ter ter shaduh Mawpat bad Hospital Neigrihms bad kan poi syndon shaduh Nongrah, Umpling haduh Laitkor. Kane ka long ka surok bah sawdong jong ki rud (Out skirt of Shillong City) khnang ban pyllait ia ka jingkhapngiah jong ka Sor Shillong.
Hapdeng sor pat, dang lah hi ban pyllait ia ka jingkhapngiah. Ka MUDA parking lot na Anjali dei ban pyniasnoh noh da ka flyover haduh parking lot jong ka Khlieh iewduh. Kane ka flyover kan bteng shaduh jingkieng Umshyrpi ne Lad Lummawbah. Kawei pat ka flyover na jan Lord Mahavira Park (Na jan lad surok khlieh iew) kan ia kynduh lang bad kane ka flyover khlieh iew ban leit sha surok Dawki. Ki kali ba wan na surok Garikhana ban leit sha Dawki/Sohra kim donkam shuh ban iaid lyngba ka Rilbong point hynrei kin iaid beit na ka flyover Mahavira Park shaduh lad Lummawbah. Wat na jingkieng Umshyrpi shaduh Lumjingthang ki Hindu/Muslim shaduh Mawprem (Sharum TB Hospital) ruh lah ban shna surok ban kham pynkylluid shuh shuh ia ka Sor Shillong.
Na All India Radio haduh Don Bosco point ruh kam don jingeh ban shan flyover lada mon ka Sorkar. Ka surok Lawsohtun – Laban pat dei ban pynmih syndon shaduh 3mer jong ka Mylliem. Ka jaka Cantonment ne Defence Land lah ban ia kren ha Delhi lada ki pyndonkam na ka bynta ka jingthmu, jingmyntoi bad ka bit ka biang jong ki paidbah. Lada kut lad palat, shna noh da ka ‘Mono rail’ ne kam don jingeh wat ba shna noh da ka Metro (Ka rel poh khyndew) kum ba long ha kiwei kiwei ki nongbah ban pynia snoh sawdong ki shnong heh (Centres) jong ka Nongbah Shillong.
Kine ki long tang khyndiat eh napdeng ki babun kiba lah ban leh hangne ha Nongbah Shillong. Kane ka long ruh tang ka jingai jingmut (Opinion/View) hynrei ka shong pat ha ki Engineer lane ki expert bad ka Sorkar ba kin pyrkhat la kane ka jingai jingmut ka lah ne em ban long (Feasible/practical) halor kane ka phang.
Babu Kular Khongjirem