Shillong,
19 Rymphang:
Ka Khasi Students Union (KSU) ba peit ia ka pule puthi ka la dawa na ka tnad bording Megha laya Energy Corporation Limited (MeECL) kam dei ban pynlip bording ha kane ka jylla khamtam ha kine ki por ba long eksam ki khynnah namar kan ktah ia ka pule puthi jong ki.
U Secretary ka KSU ba peit ia ka pule puthi u bah Donald V Thabah mynta ka sngi u la iakynduh ia Director ka MeECL (Distribution) u bah C Kharkrang ban dawa na kane ka tnad bording ba kam dei ban pynlip ding ha kine ki por ba long eksam ki khynnah.
“Ngi la dawa ba ka MeECL kan pyntikna ba kan nym don kano kano ka jingthut bording ha kine ki por ba ki khynnah ki pynkhreh ban ialeh ia ka eksam SSLC bad HSSLC ka MBOSE”, la ong u bah Thabah.
U bah Thabah u la ong ba ka seng ka la dawa ia kane namar ba mynshemsnem ha kine kipor ba long eksam ki khynnah ka don jingthut kaba khah khah ha ka bording bad kane ka la ktah shibun ia ki khynnah kiba pynkhreh na ka bynta ki eksam bapher bapher jong ki.
U President ka KSU u bah Thabah u la ong ba watla mynta u snem kam pat don kano kano ka jingthut ha ka bording hynrei kane ka jingdawa ka long tang ban pyntikna ba kan nym don kano kano ka jingpynlip ding ha kane ka por eksam.
Katkum ka jingong u bah Thabah, na ka liang u Director u la pyntikna ba kan nym don kano kano ka jingpynlip bording mynta u snem.
Ha kajuh ka pot ka KSU ka la kitbok ia baroh ki khynnah ki ban ialeh ia ka eksam bapher bapher ha kane ka jylla.
Phi don ban ong eiei?