Wat pynkynriah ia ki ophisar khah khah, ong ka KSU bad SSS Mawkyrwat

Shillong, 07 Nailur:
Ar tylli seng ka KSU bad Synjuk Seng Samla Shnong (SSSS) ka South West Khasi Hils district ki la pyrshah jur ia ka jingleh bunkam ka sorkar ban shu pynkynriah kam khah khah ia ki ophisar na katei ka distict namar ba kane ka la ktah ia ka roi ka par bad ka jingpyniaid ia ki kam ki jam.
Kine ki seng ki la iakynduh ruh mynta ka sngi ia u Chief Secretary ka jylla u Bah PBO Warjri ban kyntu ia u ba ka sor kar ka dei ban sangeh noh ia ka jingpynkynriah kam khah khah ia ki ophisar na katei ka district.
“Ka jingpynkynriah kam khah khah ia ki ophisar kiba wan trei tang shibit por, ka la pynduh nong ia ki paidbah ka district”, la ong u President ka KSU South West Khasi District u Bah Forwardman Nongrem haba iakren bad ki nongthoh khubor hadien ba la mih na kamra u Chief Secretary ka jylla hynne ka sngi Nyngkong.
U la ong ba ka South West Khasi Hills District ka dei kaba dang thymmai bad ka donkam ia ki ophisar ban don shwa katto katne por ba kin ioh ban pule ban sngewthuh ia ka jinglong jingman ka jaka bad ki briew khnang ban pynsuk ban wanrah bad ban pyniaid ia ki skhim pynroi.
Ka jingpynkynriah kam khah khah bad tang shibit ka la pynthut lut ia ka kam ka kam bad ka sorkar ka dei ban ailad ia ki ophisar ba kin trei ia ka kam, la ong sa u organising secretary ka KSU South West Khasi Hills u Bah Marcony Thongni.
“Jin lada ka sorkar ka pynkynriah kam ia kiba thiah thai, ngin sngewnguh shibun hynrei ka pynkynriah pynban ia ki ophisar ba trei ba khuid”, la ong u Bah Nongrem.
Dang shen, ophisar ka tnad Public Relation Department ka la shah kynriah kam tang hadien katto katne por bad ka sorkar ka leh ia kane khlem kano kano ka daw ba shongnia, la ong kine ki nongialam sengbhalang.
Ha kajuh ka por, kine ki nongialam sengbhalang ki la iathuh ba u Chief Secretary u la iathuh ba ka sorkar ki don ki kyndon kiba ka ka sorkar ka lah ban kynriah kam ia ki ophisar haba ka sngew donkam.
Wat la katta, u Chief Secretary u la kular hakhmat kine ki nongialam ba un sa peit ia kane ba kan nym long ka jingktah ia ki paidbah.