“Wat pynkhih ia ka skul na Mawlangren”

Shillong, 4 Lber:
Ka HNYF Kynshi circle ka la dawa na ka sorkar ba kam dei ban pynkhih ia ka Residential Skul na ka shnong Maw langren.
Ha ka shithi ba la phah sha u symbud Myntri rangbah ka jylla ba peit ia ka pule puthi Dr RC Laloo mynta ka sngi, ka HNYF Kynshi ka la ong ba ka sorkar ka dei ban shna beit ha shnong Mawlanngren ia kane ka skul, bad ym dei ban kynriah sha Lawbyrtun ka shnong kaba don ki shnong ba marjan tang saw tylli eiei katba ka shnong Mawlangren ka dei ka jaka pdeng ia baroh katei ka thain Mawthadraishan Block.
Ka seng ka la ong ba u Deputy Commissioner ka West Khasi Hills ruh u la dep pynbiang nadong shadong ban shna ia katei ka skul ha Mawlangren kaba la ai sngewbha ia ka jaka da ka Hima Nongkhlaw ha ka jingheh kaba 20 akar.
Ka la ong ba ka ophis jong u SDO (PWD) ka Nongstoin u la dep ia ka jingdonkam naduh ka 12 tarik Nailar, 2013 bad la dep phah sha u Principal secretary ka tnad pule puthi naduh ka 28 tarik Naiwieng 2013.
Hynrei kaba sngewsih ka long ba wat la dep mang pisa ia kane ka skul hynrei haduh mynta khlem pat lah ban sdang ia ka kam, la ong ka seng ha ka shithi sha u Symbud Myntri Rangbah.
Ka seng ka la pyrshah jur ruh ia ka jingtuklar u MLA ka Nongstoin u Bah Hoping Stone Lyngdoh ia ka jingthmu ban shna ia katei ka skul ha Mawlangren (Umjei) ban rah syndet sha shnong Lawbyrtun, uba dei u MLA nabar ka Mawthadraishan. Ia kane ka jingthoh  ka seng  la phah da u president bad secretary.