Wat pyniadei ia ka surok bad ka kam Uranium, ong u Mukul

Shillong, 01 Nailar:
Wat hadien ba ka sorkar ka la rai ban pyndam noh ia ka jingai bor ha ka UCIL ban surbe bad ka jingiateh ba la ai wai 30 snem sha ka UCIL ha Nongbah Jynrin ha West Khasi Hills hynrei u Myntri Rangbah u Mukul Sangma u la ong ba ka surok ka long kaba donkam na ka bynta ka roi ka par jong ki paidbah bad ka jylla.
Haba kren hadien ba la wai ka jingialang ka kabinet hynne ka sngi, u Mukul Sangma u la ong ba, “Wat pyniadei ia ka surok twolane bad ka kam tih uranium”.
Kane ka jingjubab jong u Mukul ka long hadien ba ki nongthoh khubor ki kylli, aiu ka sorkar kan leh halor ka surok Twolane na Nong-stoin sha Mawthabah kaba la pyrshah da ki paidbah da kaba kynnoh ba ka dei ka jingthmu ban pynsuk ban tih uranium.
“Balei ban pyniadei ia ka surok bad ka kam tih uranium, kane ka dei kawei pat ka lynti ha kaba ngin iakren iapynbeit bha”, la ong u Mukul.
“Ngin hap ban iakren ia ki paidbah halor ki phang ba iadei bad ki kam pynroi”, la bynrap u Myntri Rangbah.