Wat pyndonkam bakla ban ieng rud surok, kit kyiad ha Ambulance, ong u sirdar Marbisu

Shillong:Mynhynnin ka sngi, ka Hima Marbisu kala aiti ia ka kali kit nongpang – Ambulance sha ki 5 shnong kiba hap ha Hima ha ka jingialang kaba long ha shnong
Mawpunrum.
U Sirdar ka Hima Marbisu u bah Starsing Kurbah ula aiti ia kane ka ambulance kaba la pynthied ka Hima sha ki san shnong ba kynthup ia ka Mawpunrum, Mawpunneng, Mawpunneng A, Lyngwa bad ka Lum Mynsain.

Haba kren ha kane ka jingialang, u Sirdar u bah Starsing ula maham ba kane ka ambulance kam dei ban long ban pynkit kyiad, ieng rud surok ban iadih ne ban leh ia ki kam awria.
Ula ong ba ka jingaiti ka Hima ia kane ka ambulance ka long ba kan ia ka jingshakri kaba dei hok ia kiba donkam.
Ula khot bad iawer ia kine ki san shnong ba kin long kiba iatylli, bad pynneh ia ka shongsuk shongsain.
Ha kajuh ka por, haba kren bad ki nongkitkam shnong jong kine ki san shnong kila pynpaw ia ka jingsngew nguh ia ka jingshemphang u Sirdar ban pynioh ia kane ka kali kaban ai jingmyntoi shisha ia kiba duk kiba jynjar ha ka por ba ki donkam.

Ha kajuh ka por, kila pynpaw ia ka jingbynniaw namar ba ha kine ki snem ba la leit, kila ju leit ud leit kyrpad na ki nongmihkhmat ban iarap ban pynioh ambulance hynrei kam shym la urlong satia. Hynrei kila pynpaw ia ka jingkmen ia ka jinglah ka Hima ban leh ia kane ka kam kaba khraw.
La sakhi lang ha kane k sngi da ka jingdon lang ki nongialam shnong na ki shnong ba marjan, ki nongialam sengbhalang, ki nonghikai bad ki khynnah skul nalor ki nongshong shnong.

Kumban shu pynkynmaw, kine ki san shnong ki hap ha Sohiong konstitwensi ha ka MLA hynrei ha ka MDC ki hap sha ka Mawphlang-Diengiei konstitwensi.