Wat pynbor, ia u nong Mawlai, ban mih surok, ong ka Seng Samla

Shillong:Ka Seng Samla Mawlai Pyllun (SSMP) ka dap da ka jing sngewkhia haba ïadei bad ka jinglong jingman kaba la mih namar ka jingsangeh ki kali kamai ban kamai khamtam ki taksi naduh ka 3 tarik Rymphang 2021 haduh mynta.

Ka Mawlai ka dei ka shnong kaba bun bha ki nongbylla ñiah kali kamai, ki nongshong ïew naduh ki nongdie doh, bad kiwei kiwei ki kam khaïi, ki nongbylla sngi, ki samla pule bad ki don ruh kiba trei kum ki shakri Sorkar.
Kane ka jingïakhih ka la ktah shisha ïa u duk u rangli khamtam eh kiba bylla mynsngi thied khaw da miet.

Ka Seng Samla Mawlai Pyllun ka sngewdei ban kynthoh tyngeh ïa ka Sorkar ka bym don jingkitkhlieh lem ia ka jingeh ki rangli ki juki, kham tam ïa u Myntri ka tnat Transport u Bah Sniawbhalang Dhar, uba leh bympatiaw ïa kane ka jingeh jong ki paidbah na baroh ki liang.

U Myntri ka tnat Transport u dei ban kynmaw ba ka Jylla Meghalaya ka dei ka Jylla jong ka jingsyn shar paidbah, bad ka Sorkar ka dei jong u paidbah, da u paidbah bad na bynta u paidbah. U Myntri ka tnat Transport um dei satia ban mutdur ba ka Sorkar Meghalaya ka dei ka kompani, bad ma u pat un sngew ïalade kum u manager jong ka kompani bad un leh katba u sngewbit.

Ka long kaba dei eh ba ka Sorkar kan pynhiar lane map teng ïa ka khajna ba oh na ki kali kamai, khamtam ha u snem 2020, namar ki kali kamai ki la shahktah ha kito ki bnai ba treikam ka jingkhangdam (lockdown) bad ka khlam COVID. Ka long ruh kaba dei ba ka Sorkar Jylla kan pynhiar ïa ka khajna kaba oh na ka petrol bad diesel. Ka Seng Samla Mawlai Pyllun ka buh ruh ïa ka jingkylli, shano kata ka khajna ba ïoh lum na ka petrol bad diesel ka leit namar kumba la paw paidbah, bun bah ki shnong nongkyndong bapher bapher ha ka Jylla ki shah iehbeiñ bad sahdien, namar wat ki surok ruh ki long kiba sniew bad shem shitom ka leit ka wan kumjuh ruh ban pynpoi ïa ki mar rep sha ki jaka ba long ïew.

Ka jingleh mynthi jong ka Sorkar ka la wanrah jingeh shibun ïa ki paid nongshong shnong jong ka Mawlai. Lada ka Sorkar ka kwah ba ka ïoh ka kot (economy) jong ka jylla kan kiew, ka dei ban pyrkhat ïa ka jingtyllun jong ki kam ki jam ha ka jylla jong ngi. Bad ki taksi kamai ki dei kiba don ka bynta kaba khraw ban pyntyllun ïa ki kam ki jam hapoh ka jylla ka jong ngi.
Na ka liang ka Seng Samla Mawlai Pyllun, ka kyntu ïa ki nongniah taksi kamai bad kumjuh ruh ïa u paidbah ba kin pynbor ïa ka Sorkar ba ka hap leh ïa kaba bha tam na ka bynta jong ngi lang baroh. Namarkata, ka Sorkar Meghalaya lem bad u Myntri ka tnat Transport, ka dei ban shim kloi ki lad ban pynbeit noh ïa kane ka jingeh shisyndon, bad ka Sorkar kam dei ban pynbor ïa u paid nong Mawlai ban mih sha surok, ong ka kyrwoh na U Bah
S. Biam, President, Seng Samla Mawlai Pyllun bad U bah S. S. Syiem, General Secretary, Seng Samla Mawlai Pyllun.