“Wat phah die madan, da ki kynthei, ba u jop u dkhar”

Shillong, 10 Risaw:
U Rangbah BR Kharmujai, Rangbah Shnong ka Mawlai Mawdatbaki, uba la don 82snem ka rta, u don ia ki kyntien, kiba shoh jingmut, kiba ula kren ha ka jingialang mynta ka sngi, ha ka por ba pyllait ia ka kot “Ka Thma U Kada” bad kitei ki kyntien, ki long, kiba u iathuh shaphang ki jingshem jongu, naduh ka por ba u dang khynnah.
U bah Kharmujai, uba la ju tip kum U Paduh, u ong “Ha kine ki sngi, ia ki khynnah ki bym leit skul, ki ong, ki khynnah jaituh, katba ha ka por ba ngi dang khynnah ia ki bym leit skul, ki ong ki khynnah kiba smat, namar ba ki trei ki ktah, ki leit thoh dieng bad ki iarap kam ha iing”. La ong shuh U bah Kharmujai, ba ha ka por ba u dang khynnah, ki kmie ki kpa, ki phah skul, ban nang ban thoh shithi samla. “Nga la bit bha ban thoh shithi samla, naduh ba nga dang pule Class VII” ula ong shuh shuh bad da kaba ong ruh ba mynta ki kmie ki kpa, ki phah skul ia ki khun ba kin ioh kam ioh jam.
Ula ong shuh shuh, ba ki khynnah mynshwa, ki tieng ia ki kmie ki kpa. “Haba phah kam ki kmie ki kpa, hap leh stet, ba tieng ia u dieng” bad u ong ba mynshwa ki khun ki ieid ia ki kmie ki kpa, katba mynta pat ki khun kim ieid ia ki kmie ki kpa, ha kaba u ong “Ki khun mynta ki hukum ia la ki kmie ki kpa ban pynsong ja, ba ki la kyrkieh ban leit skul”.
U Rangbah Shnong, ula kren ruh shaphang U Sohpetbneng, ha kaba ula ong, ba ula ju kren ia ki briew kiba na shabar Ri, ba lada ki kwah ban iap, ki dei ban iap ha East Khasi Hills, namar ba u kham jan u sohpetbneng bad kham poi kloi sha bneng.
U Bah Kharmujai, u kren bynniaw ruh, ba ki nongdie madan Khasi, ki dei ki kynthei suda, katba ki dkhar pat, kiba die madan, ki dei ki shynrang suda. “Shiphang ki la ia long paralok” bad u ong “Lada u shynrang Khasi, u die madan, u dkhar, u jah la ka jah” bad u ong shuh shuh “Ha Mawlai, ym don dkhar kiba trei Napit, namar ba ki ia trei hi ki samla Khasi” bad u ban biang “Lada phah shong madan da ki kynthei Khasi, u jop u dkhar”. Halor ka riam ka beit ruh, u ong ba ki briew mynta, ki ia bud ia ka riam U Gandhi, ha ka por ba u dang don sha Ri Phareng, hynrei, kim shym bud satia ia ka riam boh khaila bad phong slipar, kaba u riam, ynda ula poi ha India.