Wat pdiang ia U Bah Pynshngain kum u CEM, ong ka CSWO ha u Lat

Shillong, 19 Jymmang:
Ka President ka CSWO ka Kong Agnes Kharshiing ka la ujor sha u Lat ka jylla ba um dei ban pdiang ia u Bah Pynshngain N Syiem kum u Chief Executive Member (CEM) ka KHADC namar ba u dei uwei na ki MDC ba bam ar maloi bad ka long MLA artad.
Ha ka jingujor ba la phsha sha u Lat ka jylla hynne ka sngi, ka Kong Kharshiing ka la ong ba  u Bah Pynshngaiñlang N.Syiem u CEM ba dang shu jied thymmai ka KHADC (Khasi Hills Autonomous District Council) u dei u ruh u dkhot ka Meghalaya Legislative Assembly kum u MLA bad ka jingbat kam paidbah ar tylli ka dei ka jingpynkhein ia ka riti synshar ka ri India.
Ka Kong Kharshiing ka la ong ruh ba ia kane ka kam lah ban kdew shai ha ka ain jong ka Assam and Meghalaya (Constitution of District Council Rules 1951) bad ruh katkum ka kyndon ka Article 192 ka riti synshar ka ri India.
“Lah ban kdew ba u Lat barim ka jylla Meghalaya  u K. K. Paul ruh u la pan jingshai na u myntri rangbah ka jylla halor kane”, la ong ka shithi ka Kong Kharshiing ba la phah sha u Lat thymmai ka jylla.
Ka la ong ba ia kane ka kam la ujor ruh da Public Litigation Interest (PIL) ha ka High Court ka Meghalaya  kaba la rejister ha ka P.I.L. No. 3 u snem 2014, bad la dawa ba dei ban pynduh noh ia ki dkhot ne MDC ka KHADC kiba bam ar maloi bad kane ka kam ka dang sah ha kti ka iing Kashari haduh mynta.
Ka la ong ba ia kane ka mukotduma yn sa bishar biang da ka Kashari ha ka 28 tarik mynta u bnai Jymmang ban ai ia ka rai.
Ka la ong ba u Bah Pynshngaiñlang N. Syiem  uba la jied CEM  u dei uwei na kiba ngat ha kane ka mukotduma ar maloi bad namar kata, wat ai ia ka jingmynjur ia ka jinglong CEM jongu namar ba u la pynkhein ia ka Rule 17 (1) (a) jong ka  Assam and Meghalaya Constitution of Autonomous District Council Rules 1951 bad ruh da kaba long kum u MLA ban pynkhein ia ka Article 191 (1) (a)  ka riti synshar ka ri India.
“Nga la ujor ia kane na ka bynta ban pynieng ia ka nongrim jong ka riti synshar ka ri India na ka bynta ka jingbit jingbiang jong ki paidbah”, la ong ka Kong Kharshiing.