Wat pan kwah ïa ka jingbitar na u Blei, ïoh ngin jah kwah, ong U Bah Ardent

Shillong:U President ka Voice of the People Party (VPP) u Bah Ardent M Basaiawmoit mynta ka sngi ha ka u la takraiñ tyngeh ïa ka jingpynlong aiñ ka sorkar jylla ïa ka kam khalai ha ka jylla da kaba ong ruh ba kane ka jingleh ka sorkar kan wanrah shibun ki kam sniew kiban pyn jot ïa ka jaitbyn riew baroh kawei.

U Bah Ardent u la ong ruh ba ka jingong ka sorkar ba ka ka jingpynlong aiñ ïa ka kam khalai ba kan wanrah shibun bah ki jingmyntoi kan long kaba bakla shibun namar ba ha ka Jaidbynriew jong ngi hi ngi kheiñ ba ka kam khalai ym tang ba ka dei ka kam sniew hynrei ka pop ruh. Ka jingleh ka sorkar ïa kane hi ka long ka jingpynbitar ïa u Blei bad ka jingpan kwah ïa kaba sniew namar kane hi kam dei ka kam kaba shem sngewbha ha khmat jong u la bynrap u Bah Ardent.

U Bah Ardent u la ong ruh ba kane ka jingpynlong aiñ ïa ka kam khalai kan ym pynmyntoi satia ne kyntiew ïa ka ïoh ka kot jong ka jaidbynriew kumba kam ka sorkar hynrei lada ka sorkar ka don ka jingkit khlieh ban kyntiew ïa ka ïoh ka kot ka dei ban pynkhlaiñ ïa ka rep ka riang, ka dei ban kyntiew ïa ka kam jngohkai pyrthei, ka dei ban kyntiew ïa ka khaïi ka pateng bad ban hikai ïa ki paidbah ban don ka mynsiem jong ka jingtrei shitom.

U Bah Ardent u la pynrem jur ïa ka sorkar kaba la pynïap noh ïa ka Meghalaya Preventing of Gambling Act, 1970 da kaba wanrah ïa ka aiñ Meghalaya Regulation of Gaming Ordinance 2021 bad u la khot la wer ïa ka jaidbynriew bad ka jylla hi baroh kawei ba ki dei ban ïeng pyrshah ïa kane ka jingleh ka sorkar.
“Ngi dei ka Jaidbynriew tipbriew tipblei bad ka jylla Khristan wat ai lada ba ki kam kiba pynbitar ïa u kan suhthied ha ngi” ong u Bah Ardent ha ryngkat ka jingkhot ïa ki nongshong shnong ka jylla ba kin duwai ba u Blei un pynsngewthuh ïa ki nongsynshar ba kane ka kam ba ki leh ka long kaba bakla.