Wat niewbein, ia ki briew kiba ngat na ka jingpang coronavirus, ong ki MLA

Shillong: Mynta ka sngi u lamphang ka ing dorbar ka jylla Meghalaya u bah Metbah Lyngdoh u la lum ia ki MLA kynthup ia u myntri rangbah u Conrad K Sangma, nongialam liang pyrshah u Dr. Mukul Sangma ki ophisar kynthup naka tnat ka koit ka khiah lem bad kiwei dei ki MLA kum shi bynta iathir halor ki lad lynti ban iada na ka jing pang ‘corona virus’.

Haba kren bad ki lad pathai khubor hadien ba la wai ka jing ialang, u lamphang ka ing dorbar u bah Metbah Lyngdoh u la ong ba ka mat ba nyngkong eh bala ia kren ka long ban nang pynbun shuh shuh ia ki tiar bad jaka ban eksamin ban lap ia ka jing pang ‘corona virus’ naka bynta ki paidbah.

Kawei ka sur ba mih naki nongialam kynthup na u lamphang ka ing dorbar, u myntri rangbah bad u nongialam ka liang pyrshah ka sorkar Meghalaya ka long ban kyntu ia ki paidbah ba kim dei ban niew bein ia ki briew ba ngat ka jing pang ‘corona virus’ bad kumjuh ruh ia kiba don haki ‘Quarantine centre’ ha kylleng ka jylla.

“Nga kyntu ia ki briew ba kin wan sha khmat ban phah eksamin haba dei bad ka jing pang ‘corona virus’ bad nga kyntu ruh ia ki paidbah ban ai mynsiem ia ki briew ba ngat jing pang kum shi bynta ban ia khun pyrshah ka jing pang ‘COVID-19′” la bynrap u nong ialam liang pyrshah u Dr. Mukul Sangma.

Naka liang u myntri rangbah ka jylla u Conrad K Sangma u la iathuh ba ka thong jong ka sorkar mynta ka long ban pynkiew ia ka jing eksamin naka 90 sha ka 370 haka shi sngi naduh u bnai jymmang 2020. U la ong ruh ba ka jylla kala mang ia kumba 50,000 tylli ki ‘Antibody RD testing Kit’ bad kin poi hapoh ka jylla haka taiew ba nyngkong jong u bnai jymmang.

U Conrad K Sangma u la iathuh ruh ba ka jylla kala don haduh 64,458 ki PPE’s, 80,190 ki ‘N95 Mask’, 60 tylli ki ‘BiPAP Machines’ bad haduh 5,10,000 tylli ki ‘3 Ply Mask’.

Haka jing ialang ka la don ruh ka jing ia kren halor ki marbam bad ia thuh ba ki don haduh 21, 45, 145 ngut kiba ioh marbam lyngba ka skim ‘NFSA’ naka bynta u bnai iaiong bad kumba 7, 72, 694 ngut ki ‘don ba ioh naka ‘non- NFSA’.

Haba dei bad ki samla ka jylla kiba sahkut sha kiwei pat ki jylla ka ri India Ka sorkar Meghalaya kala shim ia ka rai ban ai 3000 tyngka sha kumba 10,287 ngut naka bynta ban ai jing iarap haka por ba don ka ‘lockdown’.

Ka sorkar Meghalaya kum shi bynta ban ai jing iarap sha ki nongrep ka jylla kala ai 2000 tyngka sha kumba 87,187 ngut ki nongrep naka skim ‘PM KISAN’ bad 15000 tyngka sha kumba 3, 01,428 ngut ki long kmie lyngba ka skim ‘PM Jan Dhan Yojana’ bad 3000 tyngka sha kumba 17,649 ki nongtrei kiba shna ing bad kiwei kiwei, bad 2,100 tyngka sha kiwei pat ki nongtrei bylla hapoh ka jylla.