Shillong 28 Rymphang: U MDC na Mawkhar pynthorumkhrah konstitwensi na ka seng Voice of The People Party (VPP) u bah Strongpillar Kharjana mynta ka sngi thohdieng ka 28 tarik Rymphang 2025, ula shimti ia ka shuki kum u Chairman hapoh ka Khasi Hills Autonomous District Council ( KHADC).
Hashwa ba u bah Strongpillar Kharjana un shong ha ka shuki ban long kum u Chairman la shah pynkup da ka jain ryndia da ka kong Aibandaplin Lyngdoh ka MDC na Mylliem konstitwensi.
U bah Strongpillar Kharjana u la shimti ia ka shuki kum u Chairman ha KHADC khlem da don mano mano ba ia khun pyrshah.
Ia kane ka jingpyniaid ban jiet ia u shongknor ba donburom hapoh ka District Council la wan pyniaid da ka kong RM Kurbah, ka badei ka Deputy Commissioner jong ka East Khasi Hills District, ha kaba la sdang ban pyniaid beit thik ia kane ka program ha kapor kumna 11 baje mynstep.
Hadien ba u bah Strongpillar Kharjana ula shimti ia ka kam kum u Chairman, na ka liang ki dkhot hapoh ka iing ki la ai khublei kyrpang ia u, uba la shah jiet ban shim iakabynta kum u Chairman ban leh hok ym ban niew shiliang iano iano.
Ki la rah ruh ka jingai khublei na la kijong kijong ki paidbah nongkyrshan na ki konstitwensi jongki, ha ka ba ki paidbah ki la pynjop donburom ia ki ha kane ka kynti ba mynta.
Ki la ong ruh, ba kumba ka kyrteng jong u, kadei Strongpillagi kyrmen ba un pyniaid ia ka kam ban long uba skhem kum u Paia ban pyniaid ia ka dorbar, namar lada uwei u paia un kdiah ka iing baroh kan kyllon.
Shuh shuh ki la kyrpad ruh, ba kum u Chairman ban sa pyniaid ia ka dorbar hapoh ka iing bad nym dei ban niew shiliang iano iano ruh, hynrei dei ban leh kajuh la kalong ia ka liang iatai ne na ka liang ka liang synshar.
Phi don ban ong eiei?