Wat leit sha ka jingialang ha Urksew, dei ka jingialang ki riew shimet

Shillong, 27ïaiong:
Ka Executive Committee ka seng UDP ka la shong jingialang kyrkieh mynta ka sngi hadien ba ka la ioh jingtip ba ki 4 ngut ki briew jong ka ki la khot jingialang lashai ka sngi ka 28 tarik ha madan Urksew. Ka kyrwoh khubor na u Acting Secretary u bah Ryngkat Lyndem ka la ong la rai ban pyntip paidbah ba katei ka jingialang ka ban long ha Urksew-Pynursla kam dei satia ka jingialang jong ka Party UDP hynrei ka dei ka jingialang ba la lum da ki riew shimet bad ka mdon jingiadei eiei bad ka UDP.
Katei ka kyrwoh khubor ka la pynsma ba katei ka lah ban don ka jingiapait ia pra hapdeng ka seng UDP ha Pynursla. U nongthohkhubor u la wad jingtip na ki lad khubor mano kitei ki 4 ngut kiba ka UDP kam shym la kdew kyrteng. Kham hadien la ioh jingtip ba kitei ki 4 ngut ki long u Samuel Khongbuh u Adviser jong ka UDP Pynursla Circle, u Tani Khonglam u Secretary bad sa ar ngut ki Vice President kata u Tinsing Khongkliam bad u Barnes Marsynting. Ki lad khubor ki la iathuh ba kitei ki 4 ngut ki dei kiba ju ia don ha kti ha kjat ka kong Banalari Khongwar ka kyrtong jong ka UDP kaba la iakhun ha u 2013 na Pynursla konstitwensi kaba dei ruh ka President jong ka UDP Pynursla Circle.
Ki lad khubor ki la iathuh ruh ba ka UDP ka la weng noh ia kitei baroh 4 ngut na ka kam ba ki bat hynrei kam pat shym la weng pat na ka jinglong dkhot jong ki bad kumba long mynta la ong ba ka UDP ka dang pan jingshai na ki halor ki kam pyrshah seng. Haba pyrshang ban wad jingtip kiei kita ki kam pyrshah seng jong kitei ki 4 ngut la ong ba ki la leit sha manla ki shnong ki thaw ban kanbas na bynta ka kong Grace Mary Kharpuri bad la ong ba ki kwah ruh ba ka UDP kan ai tiket ia ka kong Grace ha u 2018. Katei ka seng ka la ong ba kitei 4 ngut ki la lu jingialang lashai ka sngi khlem ka jingtip jong ka President katei ka seng ka kong Banalari Khongwar.