Sngewtynnat ba i Bah Ardent Basaiawmoit i dang kynmaw ia ka ing rim lajong ka UDP, hynrei ka UDP kaba don mynta tang 7 ngut ki MLA ha ka ing Dorbar kaba 60 ngut, katno ka lah ban iada, haba ki MLA jong ka ruh kim tip ei-ei, namar ym pat wanrah ruh ia kane ka kam hakhmat ka Cabinet ba iadon lang.
Balei i Bah Ardent im nion beit shuwa ia ka NPP kaba khlieh ia ka Sorkar ha kaba u James Sangma u dei u Minister ki kam bording, Power?
Ka jingkylli i Bah Ardent balei ka UDP kam lah ban iada ia ka jingdie lilam ia ka MeECL sha ka Company, ka pynkynmaw ia u Suri u Aesop uba kynroi ia i khun blang iba dih um sharum jong ka wahduid ba dih ma u na neng, hana ba balei i khun blang i pynjngut ia ka um ba dih ma u?
Khyndiat Halor Kane Ka Kam Lilam
Niuma kam pher ka bynta i Bah Ardent, hynrei kaba ngi dei ban ia tip ka long, ba ngi ha ka UDP ngi la dep shong pyrkhat ha kine khyndiat sngi ynda la paw ha ki khubor bad social media, halor katei ka kam bad ngi la thung ka Committee kaban leit ia kren bad ban pan ia ki kot ki sla baroh kiba ia dei bad kane ka mat na ka Sorkar.
Kat kaba ngi lah ban ioh jingtip na ki khubor, imat ki nongialam Sorkar kynthup ia u Chief Minister ki la iakren, iapyrkhat bad la ia noh mynsiem ruh ban aiwai noh sha ka Company (RECPDCL) ban pyniaid ia ki kam ki jam kane ka tnat bording, khamtam ia ki bynta kiba hab hapoh ka Shillong bad Jowai bad sor bad shabar sor, ban peit ia ki kam ai bording sha ki shnong ki thaw, ban lum ia ki khajna bording, ban pyniaid ruh ia kane ka tnat bording (department) kaban dei ia kine artylli ki thain, kynthup ia ki nongtrei Sorkar bad tip sa kiei-kiei?
Na ka liang jong ngi, ngi ia buddien bad ngi la nang pynpaw ruh ha ki kot khubor halor kane ka kam, namar ki paidbah ruh ki la sngewkhia bha halor kane ka bynta.
Ka tnat bording (Power) ka dei kawei na ki tnat kaba pynmih bun ka tyngka (revenue), lada nang ban trei khuid jingmut da ka Sorkar ban peit ia ki kam, kane ka tnat ka lah wat ban kyrshan hi dalade ialade ruh.
Kabym lah ban sngewthuh ka long kumno ka Sorkar kam lah ban pyniaid ia kane ka tnat, kat haduh ban aiwai 25 snem sha ka Company, kata ruh ban iasoi da kata ka jingiateh Franchise, kaba ai jingmut da uta u Chairman, uba long ruh u MD ka tnat Power, u Arun Kumar Khembhavi.
Ka jingiateh Franchise ka dei kata ka rukom iateh kaba aibor ia ki Company wai ban don ki hok, wat ban ai wai kylla sa sha kiwei pat ki nongwai barit (Sub-lease), nalor ba ka lah ban leh ruh katba mon ban pyniaid khlem jingpynwit na ka nongai wai, na ka bynta ban poi sha ka jingthmu ba iateh. Ha ka Franchise hi, ki nongwai ki kham ioh ia ki hok bajynsur kyrpang (rights and privileges), kiba bunsien ki buh ia ka Sorkar ha ka jingeh ban tuklar bad bunsien hi ki bor Sorkar ki buh jingeh kylla ialade, namar ki rukom pyniaid ka Sorkar ki ju kylla na ka por sha ka por katkum ki jinglong ki kam, ki rukom pyrkhat bathymmai kiba ju mih lyngba ki jingkylla ka por bad kumta ter-ter.
Kita baroh ki rukom kylla bathymmai, kin ym poi katba kwah ka Sorkar hadien ba la iasoi ia kane ka jingiateh Franchise.
Ki nongtrei Sorkar ruh kin poi jingeh, namar kin hap ban bud ia ki rule ne ki ain ka Company, ym shuh ia ki kyndon Sorkar.
Ngi ngin ialeh ban pynbor ia ka Sorkar ba kan ym iasoi ia kane ka jingiateh, lada ka sngap ia ngi kiba tang shitroh. Ynda haba la mih kum kine ki jingeh, sa phai sha ngi ki shitroh, koit ngin leh la ka bynta, ngin sa iapeit kan poi shaei. Kyrmen ki Seng Bhalang bad ki paidbah kin iadon ryngkat.
B.M.Lanong
Ka udp kam nud bn mushlia IA ka npp namar ka ioh dih lang ia ka umngap bad Ka dud, Bad 2023 Nga kyrmen bad tikna ba ka udp kan jop sa tang 2 seat eh NE ka lah ban shah khylliap lama noh