Wat la pynbor ka sorkar pdeng ia ka lynti rel, yn ap mynjur ki paidbah, ong u myntri

Shillong:Ka Sorkar Pdeng ka la ïai pynbor ïa ka Sorkar Jylla ban pyntrei noh ïa ka Railway project ne ka lynti rel ha Jylla Meghalaya.

Ïa kane la pyn tip da u Myntri Rang bah ka Jylla Conrad Kongkal Sang ma bad u Myntri ka Tnat Tran sport u Bah Dasakhiat Lamare haba jubab ïa ka jing kylli halor kane ka kam hapoh ka Ïïng Dorbar Thaw Aiñ ha ka sngi Thohdieng.

Lah ban kdew ba ka Sorkar Pdeng ka la tyrwa ban pyntrei ïa artylli ki lyntei rel ha Jylla ba kynthup ïa ka Tetelia-Byrnihat kaba jrong 22 km bad ka Byrnihat-Shillong kaba jrong 108 km.
Ka Tetelia-Byrnihat project ka dei kaba la buh ban pyntrei ha ka jinglut jingsep ba kot T.496 klur hynrei kane ka project kam shym la urlong namar ka jingïeng pyrshah jong ki kynhun bapher bapher kiba dawa ban wanrah shwa ïa ka aiñ ba pyrkhing ïa ka jingwanrung kyrthep ki bar Jylla.

“Ka don ka jingpynbor kaba jur ïa ka Sorkar Meghalaya ban pyntrei ïa ka lynti rel. Hynrei, nga la pynpaw hakhmat u Myntri ka Tnat Lynti Rel, haba nga ïakynduh hynriew bnai mynshwa, halor ki jyrwit jyrwat jong kane ka project bad ula kren shai ïa nga ba ka Sorkar Pdeng kan sa pyntrei ïa kane ka project hadien ba ka Sorkar Jylla bad ki paidbah ki la mynjur namar ïa kane ka project la wanrah na ka bynta ka jingmyntoi ki paidbah” ong u Conrad.

Haba pynpaw ba ka sorkar ka angnud eh ban pyntrei noh ïa ka lynti rel, u Myntri Rangbah ula ong “Nga la pyntip sha ka Sorkar India ba ngin sa pyntyllun shakhmat ïa ka kam hadien ka jingïakren bad ki kynhun bapher bapher jong ka Jylla. Ngi kwah eh ban pyntyllun shakhmat hynrei yn leh ïa kane hadien ba la ngi ïoh lang ïa ka jingmynjur ki paidbah”.
U Conrad u pyntip ba ka Assam ka la pyntrei shaid shaid haba phai sha ka jingpyntrei ïa ki lynti rel na Tetelia sha Byrnihat hynrei namar ka jingjia kaba jia ha ka por basdang pyntrei ïa ka project ha Meghalaya, kane ka kam ka la sakut noh.
U Conrad u pyntip ba ka Sorkar ka la dep shong jingïalang bad ki katto katne ki kynhun ba lada long, yn pyntrei noh ïa ka lynti rel tang jong ki rel kit mar kit mata haduh Byrnihat khnang ba kan myntoi ka Jylla.
“Ka don ka kynja jingïateh soskular halor ki rel kit mar hynrei ka don ka jingpyrshah kaba jur ïa ki rel kit briew,” ula ong haba bynrap ba ula kyrpad ruh ïa u Myntri ka Tnat Railway barim ban buh ïa ka check point ha Mendipathar Railway Station khnang ban lah wanrah ïa ka jingshaniah jong ki paidbah ka Jylla.

U Conrad ula pyntip ba ka Sorkar Jylla ka la shim ruh ïa ki sienjam ban leh eiei halor ka jingwan rung kyrthep ki bar Jylla da kaba pynkylla thymmai ki kyndon jong ka Meghalaya Resident Safety and Security Act (MRSSA) bad mynjur ruh ïa ka Resolution ban pyntreikam ïa ka Inner Line Permit (ILP) kaba dang ap ïa ka jingai jingmynjur ka Sorkar Pdeng.
Halor ka jingkylli ba la wanrah da u MLA ka Nongpoh Bah Mayralborn Syiem, u Bah Dasakhiat ula ong “Kila don shibun ki jingpynbor na ka Sorkar India ban pynïaid shakhmat ïa ka project hynrei ngi hap ban pyrkhat ïa ki jingpyrshah bad hap ïakren bad ki kynhun bapher bapher nalor ban pyrshang ruh ban pynïoh lang ïa ka jingmynjur jong ki.
U Myntri u pyntip ba namar ka jingpyrshah, haduh mynta ym pat shym la pyntrei khyndiat ruh ïa ka kam bad kam pat don ruh ka jingmang tyngka ïa kane. U pyntip ba ka survey ka la dep naduh Tetelia sha Byrnihat haduh Lailad.