Wat la pynbeit thymmai, ym dei ban pynjlan elekshon, ong U CEM barim

Shillong:U nongialam liang pyrshah ha KHADC na ka UDP u bah Titossterwell Chyne, u la ong ba wat la ka KHADC, ka pynkhreh ban pynbeit thymmai ia ki katto katne ki konstitwensi ban pyn iahap katkum ka jingbun briew, hynrei kam dei pat ban ktah haduh ban pynjlan ia ka elekshon jong ka Council.

Haba kren mynta ka sngi, u bah Titosstarwel u la ong ba ka jingpynbeit ia ki konstitwensi ka lah ban dei ruh ka jingkhmih lynti lada kan wan ka jingpynkylla ia ka Sixth Schedule. Hynrei ha kajuh ka por, u la ong ba kawei pat ka long ba ka jing pynbeit thymmai ia ki konstitwensi ka la don ruh naduh mynshwa wat ha u snem 2014 ruh ha kaba la pynduh ia ka Laitkroh bad la pynmih ia ka Umsning.
U la ong ba kaba donkam ia ka Executive Committee ka long ban buh ia ka por ban pyndep ia ka jingpynbeit ia ki konstitwensi khnang ba ki shnong ne ki paidbah kiba shah ktah kin lah ban ai jingthoh sha ka Council.

“Ha ka jingsngew jong nga, ka jingpynbeit thymmai ia ki konstitwensi kam dei ban ktah ne pynjlan ia ka elekshon bad ka EC ka dei ban ai ka por kaba biang khnang ba ki paidbah ne ki nongshong shnong kiba shah ktah kin lah ban ai jingthoh sha ka Council”, la ong u bah Titosstar.
Lah ban kdew ba ka EC kaba ialam u bah Pyniaid Sing Syiem kum u CEM ka NPP, ka la pynkhreh ban pynbeit thymmai ia ki konstitwensi ban pyniahap ia kiba bun palat bad ban pynkynriah ne pynhap sha ki konstitwensi kiba kham duna briew ne nongthep vote.