Wat la khang ka doh masi, hynrei ka iew dohsniang, dohkha kam kiew satia

Shillong: Mynta la jan shibnai ki nongdie doh masi ki la khang doh masi ha nongbah Shillong, kaba la sdang naduh ka 7 tarik u Jylliew bad katei ka jingkhang doh masi ka dang iai bteng haduh mynta mynne ruh.
Mynta ka sngi u nongthohkhubor u la leit ban jurip ia ka iew die doh masi ha basa doh ha iewduh bad la lap ba ka basa doh masi ka thylli bad ki don katto katne tylli ki dukan kiba ju die doh masi kila die noh da ka doh sniang.
Haba la twad shaphang ka jinglong jingman ka rukom iohnong, hadien ba la khang ki nongot doh masi, uwei na ki nongdie doh sniang u la ong ba ka iew kam kiew kam hiar satia naba ki nongdie doh masi ruh mynta ki shong die doh sniang.Nangta ki paitbah kiba ju bam doh sniang te ki thied doh sniang bad ki ba bam doh syiar ki thied doh syiar bad kiba ju bam doh masi te ngam tip ki leh kumno.
Ki nongdie doh syiar ki la ong ba ka iew ka long kumjuh kam kiew kam hiar bad ki iathuh ba kiba thied doh syiar ki dei beit kito kiba ju bam doh syiar bad ka neh kumjuh,wat la don ki sngi kiba kham kiew malu mala ruh.
Haba la pyrshang ban kylli ruh na ki nongdie dohkha,ki la ong ba ka jinglah die jong ki kam da long eh ban ong ba ka kiew ne ka hiar,hynrei la sngewthuh ba kadon hi ka jing kham kiew,wat la kim iathuh haduh katno ka tam iakaba mynshwa.