Nongpoh:Ki nongialam ka Synjuk ki Rangbah Shnong Umroi-Umiam Area, lyngba ki nongkitkam jong ka, kiba kynthup ia u Bah Sent Thabah, kum u Chairman, u Bah PB Sylliang, Secretary kum u Secretary, u Bah Bandari Ryntathiang, Vice Chairman lem bad kiwei kiwei ki nongkitkam ka synjuk, ki la pynmih ia ka sur ban ai jingmut sha ka sorkar, ba kam dei ban pyrkhat lane ban leh kyrkieh ha ka ban tei ia kita ki 11 tylli ki Mini Secretariat hapoh ka jylla, hynrei ki dei ban pyrkhat lane thaw ia ki lad ki lynti ha ka ban pynbha bad kaba wanrah jingshngain ia ar-tylli ki Jingkieng, kiba kongsan bha hapoh ka jylla, kata kawei ka Jingkieng heh ha Umiam bad kawei pat ka Jingkieng Dwar Ksuid kaba don ha Umroi Shillong Bye-Pass.
Kitei ki kyntien, kiba la mih na ki nongkitkam katei ka Synjuk, ka dei hadien ka jingleit jurip ka jong ki myn hynnin ka sngi Saitjain, ha kaba ki la lap ba kitei ki Jingkien kiba dei ruh ki Jingkieng kiba kongsan eh hapoh ka jylla, kim long shuh kiba shngain na ka bynta ban iaid ki kali kit khia.
La sngewthuh ba ka nongrim kaba la pynlong ia kitei ki nongialam katei ka Synjuk ba kin pynmih ia kitei ki kyntien, ka dei namar ba dangshen ki bor pyniaid Distrik ha Ri Bhoi, ki la pynmih ia ka jingmaham ban khang pyrshah halor ka jingiaid ki kali kitkhia bad kiba la palat ia ka 20-ton ba kim dei ban iaid lyngba ka Jingkieng Dwar Ksuid, hynrei la pynmih pat ia ka hukum ba ki dei ban iaid lyngba ka Jingkieng heh Umiam.
Kitei ki nongialam katei ka Synjuk, ki sngew ba lada baroh kitei ki kali Kitkhia kin iaid lyngba katei ka Jingkieng heh ha Umiam, kan sa wanrah ia ka jingma kaba khraw, namar ka dei ka Jingkieng kaba la rim bha bad kaba lah ban wanrah jingma, na ka jingiaid kaba khlem sangeh ki Kali kitkhia, haba kaba baroh ki kali kitkhia ki hap ban iaid lyngba katei ka Jingkieng kaba la ai jingshakri mynta la 50 snem ei ei.
Shuh shuh, kitei ki nongialam katei ka Synjuk, ki la ther tyngeh halor ka jingkren u Bah Prestone Tynsong, Symbud Myntri Rangbah ka Jylla, u ba la kam ba ka Jingkieng heh Umiam ka dang long shngain na ka bynta ban iaid ki kali heh, hynrei ha ka jingshisha hi ka long ba wat ki bor ka MeCEL ruh, ki la kam ba katei ka jingkieng Umïam kam long shuh kaba shngain, na ka bynta ban iaid ki kali kiba la kit khia.
Hadien ba la khang iaid ki kali kit khia ban iaid lyngba ka Jingkieng Dwar Ksuid, baroh ki trok kiba kit khia ki hap ban iaid lyngba ka Jingkieng Umiam, namarkata haba ki iaid da ki spah spah tylli bad haba ki kit da ki phew phew ton, kan sa wanrah jingma ba khraw ia katei ka Jingkieng, kumta ka donkam ia ka sorkar ba ka dei ban pyrkhat kyrpang bad ban thaw ruh ia ki Lad ki lynti, khnang ban lait na ki jingeh hadien habud, ki la bynrap.
Phi don ban ong eiei?