“Wat kynriah ia u Mawpud uba rim!”

AIS Suja

“Wat pynkynriah ia u Mawpud uba rim”. Kane ka dei ka jingmaham na u Blei lyngba ki Proverb u Solomon 23:10. “Do not move an-ancient boundary stone”. Ha kawei pat ka kyntien la ong – “Wat pynkynriah noh ia u Mawpud uba rim, uba ki kpa jong me ki la buh”. Proverb 22:28. “Do not move an-ancient boundary stone set up by your forefathers”.

Kane ka jingong jong ka ktien u Blei ka long kaba dei 100%. U Blei u la kren lyngba u Syiem Solomon u khun u David, u Syiem ki Israel. U Blei u iohi ia ka jinglong ki briew ha Israel bad ym tang ha Israel hynrei ki jaidbynriew ka pyrthei ki leh ia kane ka jait pop haduh kine ki sngi ba mynta.
Ka jingkynriah ia ki Mawpud ka mih na ka donud kaba shukor kaba thok lute ia ka jong kiwei pat ki parabriew. Kane ka dei ka jingkhwan lalot bad jingikwah ia ka jong kiwei pat ia kaba u Blei u la dep maham da kaba ong – “Men ym i kwah”. Exodus 20:17. Na ka daw ka jingikwah lalot, u briew u la phut bad kynriah ia u mawpud uba rim ia kiba ki la buh, la ka long ha ki lyngkha ki briew ne ha ki jaka thaw iing thaw sem.
Ka jingkynriah ia u Mawpud uba rim, ka pyllong ia kiwei pat ban khie bitar bad kaba mih na kane ka long ka jingialeh ia mynsaw mynsnam parabriew bad kane hi ka la long ka thma iaknieh namar ba la knieh jubor ia ki jaka puta ba la pynieng Mawpud. Bunsien kane ka jait kam ka poi wat shaduh ki iing bishar badonburom ban wad ia ka jingshisha ban pyniasuk, ne pynioh pat ia ka bhah ka bynta uba dei hok ban ioh. Ha kine ki sngi bun ki briew kim khein sang shuh ban kynriah ia ki Mawpud jong kiwei pat tang ban pynheh ia la ka jong khlem da khein shuh ia ka pap ka sang. Lada kin iohi lei ia kiba duk ki riew kynthei khun swet khun rangli, ki ia kmen ban leh ia kane ka jait kam, ki thombor ia ka hok kiwei da ka jubor justi, bad kane ka long ka jingleh donbor thombor ia ka hok jong kiwei pat ki parabriew. Bun bah ha kine ki sngi ki ioh ia ka dohnud maw khlem sheptieng shuh ia u Blei khlem burom shuh ia ki para briew, biang tang ialade kiwei mat dep shato, kane ka rukom leh ka jia ym tang ha Israel bad ha kiwei pat ki Ri hynrei ka jia ha ka Ri ka jong ngi ruh, naduh uba poh tam haduh uba khraw tam synshar ka lalot ka khwan ha kane ka jingim ha ka met khlem da pyrkhat shano ka mynsiem kan poi, namar kiei kiei kiba u briew u don kim long ki jong u hynrei ki dei ki jong u Blei kein. Ka khyndew bad ka bneng ki long ki jong u Blei bad ka jingim u briew kim long satia ha kita kiei kiei kiba u don. Bad u briew un myntoi aiu ban ioh ia ka pyrthei baroh kawei lada un duh noh ia la ka mynsiem sha dujok? Mathaios 16:26.
Kine kiei kiei, u briew um pyrkhat u thom ia ka sang ka ma da ka pynkynriah ia ki Mawpud kiba rim jong kiwei pat. Ym tang ha la ki shnong ki thaw ha ki bri ki khyndew hynrei wat haduh ka Ri, ki briew ki ktah ban pynkynriah ia ki Mawpud kiba rim. Ha ka Ri jong ngi mynta ia ki mawpud la pynkynrriah na shatei bad na shathie, ka Ri ka la nangrit, katba kiwei pat ki la nang khraw, bad kumne khlem da pyrkhat shuh ia ki parabriew kiba ia im ia sah ha kane ka pyrthei. Ia ka Ri jong ngi la pynkynriah ia ki mawpud jong ka ia kaba ki Kpa tymmen hyndai ki la pynieng; u Blei un sa bishar ia kane.
Ka jingkynriah ia u Mawpud jong kiwei pat, ka long ka kam lute. “Wat lute ia uba duk, namar u long uba duk ……. naba u Trai un iasaid ia ka kam jong ki, bad un lute ia ka jingim jong kiba lute ia ki”. Proverb 22:22-23. “Wat kynriah ia u Mawpud uba rim, wat leit sha ki lyngkha jong ki khunswet, naba u nongsiewspah jong ki u long uba khlain, UN IASAID IA KA KAM JONG KI PYRSHAH IA ME”. Proverb 23:10-11.
Namar kata, u Blei u maham jur ia kito kiba pynkynriah ia u MAWPUD, ia uno uno u Mawpud.